Шпанскиот стратег Раул Алонсо ќе биде нов предводник на македонскиот шампион Еурофарм Пелистер. Тој потпиша договор до крајот на оваа и за следната сезона, па ќе остане во Битола најмалку до летото 2026 година.

45-годишниот Раул Алонсо голем дел од својата ракометна кариера како тренер ја мина во Германија. Тој работеше во Обернбург, Рајн Мен Бинен, а од 2010 до 2015 година беше дел од стручниот штаб на големиот Кил.

Со „зебрите“ стана двоен европски првак како асистент на Алфред Гисласон, а заедно освоија и серија на домашни трофеи од Бундеслигата, Купот и Супер Купот на Германија.

Потоа стана директор на академијата на Кил, а напоредно работеше и во Германската ракометна федерација. Самостојна кариера почна во Австрија, каде со успех го водеше Тирол. Во 2018 година ја прифати понудата на Маноло Каденас и се пресели во Мешков Брест како асистент тренер.

По само една сезона го презеде кормилото на белорускиот првак и не погреши. Во две сезони како прв тренер на екипата ги освои сите домашни трофеи и стигна до четвртфиналето и осминафиналето на Лигата на шампионите. Во 2022 година Раул се врати во Германија и го водеше тимот на Ерланген.

Тој би требало да го има своето деби на клупата на Еурофарм Пелистер веќе на мечот со Прилеп в петок, додека во Лигата на шампионите ќе дебитира на дуелот со данската Фредериција.

Европската ракометна федерација ги делегираше официјалните лица за натпреварите од третото квалификациско коло во Лигата на Еропа.

Македонските судијки Силвана Карбеска и Марија ќе имаат шанса оваа сезона по средбите во Лигата на шампионите и Европскиот Куп, одново да судат и во второто по ранг европско клупско натпреварување.

Карбеска и Илиева се делегирани од ЕХФ за реванш средбата меѓу шпанската Супер Амара Бера Бера и полскиот МКС Лублин.

Натпреварот меѓу Бера Бера и МКС Лублин ќе се игра на 17 ноември со почеток од 12:00 часот во спортската сала „Хозе Гаска“ во Сан Себастијан.

За амбициозниот тим на Охрид по елиминацијата од Европа, приоритет остануваат домашното првенство и Купот на Македонија. Следен предизвик за „гладијаторите“ ќе биде уште еден дерби натпревар, овојпат на домашен терен.

По поразите на гости во Скопје и Битола од Вардар и Еурофарм Пелистер, избраниците на Стевче Алушовски ќе се соочат со „сино-белите“ од Автокоманда предводени од Кирил Лазаров.

Тимот од Автокоманда досега запиша само победи на десет натпревари, но сега оди на жежок терен, каде во минатата сезона се „лизна“. Кружниот напаѓач Владимир Бојаниќ посакува да се повтори натпреварот од минатата сезона.

„Гостите немаат ниту еден пораз оваа сезона, но и минатата сезона беше така, па ги победивме во Охрид откако имаа серија од 17 натпревари без пораз, па би сакал да ја продолжиме традицијата. Имаат сериозен состав, играат долго време заедно, повеќе македонски репрезентативци, но ние се подготвуваме најдобро што можеме за да го направиме истото што го направивме минатата сезона“, изјави Бојаниќ.

Српскиот интернационалец посакува полни трибини во СРЦ „Билјанини Извори“. Навивачката група „Рибари“ ќе прослави убав јубилеј на овој меч – 35 години постоење.

„Сите се подготвуваат тактички, прават видео анализи, како ние така и тие. Мислам дека пресудна ќе биде играта во одбрана и поголемата желба за победа. Ние треба да бидеме 50% со поголема желба, играме пред нашите навивачи, кои се надевам дека ќе ја исполнат салата и во оваа прилика сакам да ги повикам сите да дојдат и да ни дадат поддршка“, заврши Бојаниќ.

Натпреварот меѓу Охрид и „сино-белите“ од Автокоманда се игра во СРЦ „Билјанини Извори“ в сабота со почеток во 18:30 часот.

Селекторот на женската репрезентација на Романија, Флорентин Пера, го објави списокот на ракометарки за Европското првенство во Унгарија, Швајцарија и Австрија.

Тој ќе смета на 18 ракометарки, кои ќе бидат дел од натпреварите во „Златната лига“ во Данска, а потоа и на континенталниот собир.

На списокот ја нема Кристина Ласло, која Пера ја тренираше во неговиот клуб Глорија Бистрица, по нивниот меѓусебен конфликт, а нема да игра ниту Елиза Бучески, која се откажа од националниот тим, откако Пера не ја повика на последните два собири.

Романките се во групата Б што ќе се игра во Дебрецин, заедно со Црна Гора, Србија и Чешка, па ќе има добри шанси да се избори за главната рунда.

Екипата на Чаир поради европските настапи денеска ќе го одигра последниот дуел од регуларниот дел од Женската лига.

Избраничките на Басри Љатифи ќе бидат домаќини на Астибо, во натпревар кој нема никакво значење за двете екипи.

Чаир е голем фаворит на денешната средба и се очекува без проблеми да ги освои планираните два бода.

Денеска ќе се одигра натпреварот меѓу Вардар и Пелистер во групната фаза во Купот на Македонија, по што ќе се знае третиот патник на Ф4 турнирот.

ДЕНЕСКА НА ТЕРЕНИТЕ:
17:00 ИЖЕВСК – ЦСКА (РУСИЈА)
17:00 ВАРДАР – ПЕЛИСТЕР (МАКЕДОНИЈА)
18:00 ГОРЕЊЕ – ОРМОЖ (СЛОВЕНИЈА)
18:00 ЃЕР – СОМБАТЕЉ (УНГАРИЈА)
18:30 ЧАИР – АСТИБО (МАКЕДОНИЈА)  
19:00 РАДНИЧКИ – ВРАЊЕ (СРБИЈА)  
19:00 ФАСАНО – САСАРИ (ИТАЛИЈА)
20:00 БАРСЕЛОНА – АДЕМАР (АСОБАЛ)
20:00 ХОРСЕНС – ИКАСТ (ДАНСКА)
20:00 ДИЖОН – ТУЛУН (ФРАНЦИЈА)