Македонскиот интернационалец Дејан Гошевски од денеска не е повеќе член на хрватскиот тим Метковиќ.

Гошевски имаше одличен старт на сезоната на индивидуален план, но тимот не играше според очекувањата и врза неколку порази во серија.

Најпрво беше сменет тренерот Дамир Батиновиќ, а сега и неговиот заменик Жељко Аниќ исто така веќе е минато за Метковиќ.

Потоа сметката ја платија и интернационалците од Босна и Херцеговина, Дамир Кадриќ и од Македонија, Дејан Гошевски.

Тој во Македонија беше дел од Металург, Охрид, Тиквеш и Голден Арт пред летово да се пресели во Хрватска.

Селекторот на Хрватска, Ивица Обрван, го објави скратениот список на ракометарки пред Европското првенство во Унгарија, Швајцарија и Австрија.

Некогашниот македонски селектор смета на 20 ракометарки, но на списокот не се најдоа трите главни ѕвезди – Ќамила Мичијевиќ, Валентина Блажевиќ и Теа Пијевиќ.

„Ова е исклучиво моја одлука за ова ЕП. Ниедна ракометарка не престана да биде дел од репрезентацијата, и на сите им се вратите отворени. На списокот има многу млади ракометарки кои треба да бидат иднина на хрватската селекција“, изјави Обрван.

Покрај претходно споменатото трио, Обрван нема да може да смета ниту на пивотменката Ана Дебелиќ.

Хрватската јавност во нивно отсуство најмногу ќе очекува од капитенката Јежиќ, голманката Капитановиќ, како и од бековите Пркачин и Милосављевиќ.

Хрватска е во група со еден од домаќините, Швајцарија, како и со Данска и Фарски Острови, а натпреварите ќе ги игра во Базел.

Репрезентативката на Македонија, Сара Стефаноска, заедно со Јагогина се израдуваа на петтиот сезонски триумф во српскиот шампионат.

Јагодина за ривал во 8. коло го имаше некогашниот шампион на Србија, Наиса Ниш, и успеа да триумфира со плус шест, 27:21.

Екс ракометарката на Вардар во дадената минутажа на теренот запиша четири гола од шест обиди, а зад своето име имаше и две асистенции.

За Јагодина ова беше важна победа пред реванш натпреварот против Јонијас во рамки од 3. коло од Европскиот Куп.

Клубот на Стефаноска на првиот дуел беше поразен од грчкиот клуб, загуби со седум гола разлика, 27:20.

Екипата на Чаир поради европските настапи денеска ќе го одигра последниот дуел од регуларниот дел од Женската лига.

Избраничките на Басри Љатифи ќе бидат домаќини на Астибо, во натпревар кој нема никакво значење за двете екипи.

Чаир е голем фаворит на денешната средба и се очекува без проблеми да ги освои планираните два бода.

Денеска ќе се одигра натпреварот меѓу Вардар и Пелистер во групната фаза во Купот на Македонија, по што ќе се знае третиот патник на Ф4 турнирот.

ДЕНЕСКА НА ТЕРЕНИТЕ:
17:00 ИЖЕВСК – ЦСКА (РУСИЈА)
17:00 ВАРДАР – ПЕЛИСТЕР (МАКЕДОНИЈА)
18:00 ГОРЕЊЕ – ОРМОЖ (СЛОВЕНИЈА)
18:00 ЃЕР – СОМБАТЕЉ (УНГАРИЈА)
18:30 ЧАИР – АСТИБО (МАКЕДОНИЈА)  
19:00 РАДНИЧКИ – ВРАЊЕ (СРБИЈА)  
19:00 ФАСАНО – САСАРИ (ИТАЛИЈА)
20:00 БАРСЕЛОНА – АДЕМАР (АСОБАЛ)
20:00 ХОРСЕНС – ИКАСТ (ДАНСКА)
20:00 ДИЖОН – ТУЛУН (ФРАНЦИЈА)

Репрезентативецот на БиХ, Харун Хоџиќ, кој од 2018 година настапува во францускиот шампионат, поточно во Шамбери, одлучи да ја промени средината.

Младиот голман ќе остане во Франција, но од наредната сезона ќе брани во тимот на Ним. Станува збор за клуб кој што во оваа сезона е меѓу петте најбогати клубови во Франција, има буџет од околу шест милиони евра.

Хоџиќ со раководството на Ним се договори на соработка со важност до три сезони, односно до јуни, 2028 година, па така босанскиот интернационалец поголемиот дел од кариерата ќе го помине во Франција.

Босанскиот голман во Шамбери пристигна во текот на 2018 година и само на 19 години дебитираше за познатиот француски клуб.

Минатата сезона, 24-годишниот голман беше меѓу најдобрите голмани во најквалитетното француско натпреварување.