Петровиќ: Нема тајни меѓу нас и Охрид, одиме по нови бодови

Македонскиот шампион Еурофарм Пелистер во добра атмосфера по ремито со Спортинг Лисабон во Лигата на шампионите ќе ги дочека следните натпревари во домашното првенство и во елитната конкуренција.

Тимот на Бранко Ангеловски го очекува дуелот со залетаниот Охрид, кој досега запиша шест победи на шест одиграни натпревари во Супер лигата, но имаше полесен распоред и полесни ривали.

Битолчани имаат загубено досега само од Вардар на гостувањето во Скопје, а победуваа кај Куманово, Тиквеш и Бисинов, додека на домашен терен беа подобри од Пролет и Струга.

Десниот бек Павле Петровиќ има своја улога во тимот, особено на натпреварите од Супер лигата, вели дека знаат се за противникот и тој и неговите соиграчи одат по триумф за нови бодови.

„Имаме многу кратко време да се подготвиме за натпреварот со Охрид, но така е во текот на целата сезона кога се играат натпревари напоредно за Лига шампиони и домашното првенство, напорно е да се игра среда-сабота. Се подготвуваме и тренираме силно и продолжуваме во истото темпо како против Спортинг. Одиме на победа со Охрид и така ќе биде до крајот на сезоната. Што се однесува до екипата на Охрид тие ни се позната екипа поради тоа што од ланската сезона имаат голем број исти играчи и затоа немаме некои тајни меѓусебе. Знаеме со кој играме и знаеме како да се подотвуваме. И секако одиме на победа да запишеме нови бодови“, изјави Петровиќ.

Во последните две сезони екипите на Еурофарм Пелистер и на Охрид играле петпати на официјални средби во Првенствот и Купот, и на сите победиле домашните ракометари. Лани во Битола триумфираше Еурофарм Пелистер со 31-27, и тоа со пресврт во последната четвртина од натпреварот во корист на битолчани.

Сезонава Охриѓани се засилија со повеќе квалитетни ракометари, а тимот на Еурофарм Пелистер ја подига формата во играта. Осоколени после добрата партија во средата, имаат нов мотив за докажување.

Алушовски: Притисокот и фаворитската улога се кај Еурофарм Пелистер, ние немаме што да загубиме

Ангеловски пред дербито на колото: Ја имаме насоката како треба да играме против Охрид