Тимот на Ле Самбр Авенуа, каде што игра македонската репрезентативка Јована Кипријановска, стартуваше победнички во Купот на Франција.

Ле Самбр Авенуа, кој е во група со Ле Авр и Стела Сен Маур, славеше во првиот меч кај Ле Авр со 31-28 и се доближи до четвртфиналето.

Кипријановска имаше одличен настап, беше втор стрелец и успеа да постигне четири погодоци од шест обиди.

Мечот со Стела Сен Маур, Кипријановска и нејзиниот клуб го играат на 16 ноември и имаат убава шанса да се пласираат во четвртфиналето на Купот, каде чекаат најголемите фаворити Мец и Брест Бретањ.

Македонскиот шампион Еурофарм Пелистер му го расипа дебито на клупата на Тиквеш на Кристијан Грчевски и славеше во Кавадарци со 31-27. Домашните во салата „Јасмин“ пружија силен отпор, особено во првиот дел, но битолчани заиграа посериозно во второто полувреме и не дозволија непријатно изненадување на стартот на теренот каде што Вардар загуби минатата сезона. Митревски беше одличен на голот, а во нападот доминираше Пешевски.

Битолчани беа без повредениот Хосни и казнетиот капитен Кузмановски, а кавадарчани тргнаа фуриозно на стартот и поведоа со 7-3. Тоа го натера Бранко Ангеловски да побара тајм-аут, но ништо особено не се промени на теренот.

Погодуваа и пелистерци, но имаа многу пропусти во одбраната и Тиквеш тоа го користеше на најдобар можен начин. Арсиќ исто така фати неколку удари и кавадаречкиот тим одржуваше водство од два до четири гола.

На крајот на полувремето Еурофарм Пелистер имаше шанса за минус еден, но не погоди, па на пауза беше 17-15. Како што кавадарчани имаа одличен старт на првиот дел, така беше со битолчани во второто полувреме.

Постигнаа шест гола во серија, Митревски беше одличен на голот, а одбраната не дозволи погодок 12 минути, за 21-17 и најава за триумф на шампионот. Грчевски повика тајм-аут, ги смири своите избраници, кој се вратија на минус еден.

Абутовиќ доби директен црвен картон за старт над Обина, но тоа не се покажа како голема пречка за битолчани, кои одново стигнаа до плус четири. Кавадарчани не се откажуваа, ја бркаа негативата, но не можеа да сторат многу против расположениот Митревски на голот на шампионот, кој до крајот рутински успеа да го доврши натпреварот.

Пешевски погоди осум пати, додека Тајник постигна шест погодоци во мрежата на Тиквеш. Во кавадаречкиот состав по пет пати стрелаа Обина и Анастасовски.

Со два меча во Прилеп и Битола, денеска стартуваше новата сезона во Женската лига. Пелистер со новиот тренер Борче Корлевски имаше победнички старт и запиша убедлив триумф над Гевегелија со 38-12.

Гостинките отворија со водство, но потоа домаќинките погодија 12 пати по ред и веќе беше јасно каков тек ќе има овој дуел. На паузата беше 21-6 за битолчанки, а вториот дел беше само рутински одработен.

Моника Босилковска броеше до 11, а по пет пати стрелаа Тодоровска и Котевска. Кај Гевгелија, Динева и Ступар запишаа по три гола.

Вардар предводен од младинската репрезентативка Леона Миленкоска, славеше на гостински терен кај амбициозната Деспина со 33-21. Отворија вардарки со водство 5-1, избраничките на Адријано Котевски се вратија во егал, 10-10, но потоа одново паднаа во ритамот, а тоа го искористија вардарки за плус три на пауза, 14-11.

Деспина имаше минус еден во вториот дел, 15-14, но не успеа да направи комплетен камбек и колата тргна надолу. Вардар постојано го зголемуваше водството, ги казнуваше сите домашни грешки и на крајот славеше убедливо во Прилеп.

Најдобри стрелци во победничкиот тим беа Миленкоска со осум и Тодоровска со шест гола, додека кај Деспина се истакнаа Камческа со шест и Цветкоска со пет погодоци.

Покрај Порто, екипата на Вардар денеска ја доби потврдата дека во групната фаза од Лигата на Европа ќе игра против германскиот Мелсунген и исландскиот Валур.

Мелсунген славеше и на реваншот кај Елверум, а тоа значи дека во Скопје ќе дојдат екс вардарците – тренерот Роберто Парондо, десниот бек Даинис Кристопанс и пикерот Рожерио Мораес.

Вардар ќе игра и против Валур, кој загуби дури со осум разлика на реваншот кај Спачва и среќно го потврди пласманот во групната фаза по домашниот триумф со девет гола.

Раде Стојановиќ и неговиот Тримо Требње загубија на гости кај Лимож и се елиминирани, исто како и Мартин Поповски и неговиот тим Цирих. Поповски одново беше најдобар со шест гола и на реваншот со Криенс Луцерн, но победата од четири гола не беше доволна за пласман во групи.

Во групите се пласираа и чешкиот првак Карвина, шведскиот тим Иштад, како и шпанскиот Гранољерс. Се очекува утре пласманот во следната фаза да го потврдат Адемар Леон, Гумерсбах и Силкеборг.

Лига на Европа, квалификации:

Спачва Винковци – Валур 32-24
Извиѓач Љубушки – Бањик Карвина 32-26
Елверум – Мелсунген 31-36
Цирих – Луцерн Криенс 38-34
Мадеира – Иштад 35-33
Гранољерс – Кристијанштад 30-28
Лимож – Тримо Требње 35-24