По поразот во претходното коло од Вардар, ракометарите на Охрид се пред нов предизвик во рамките на 7. коло од суперлигашкиот плеј-оф.
Во сабота ги очекува тешко гостување во Кавадарци, кај тимот на Тиквеш, директниот ривал за место во европските купови.
Кружниот напаѓач на Охрид, Владимир Бојаниќ, свесен е за важноста на натпреварот и вели дека тој и неговите соиграчи се подготвени да дадат се од себе за да забележат победа и враќање на победничката патека.
„Дуелот со Тиквеш е од исклучителна важност. Сите сме максимално фокусирани и како и на секој натпревар така и на овој одиме на победа. Се подготвуваме да одиграме што е можно подобро, да покажеме дека сме една квалитетна екипа и дека поразот од Вардар е само еден лош ден. Играме се подобро и подобро и верувам дека ќе дадеме се од себе да ги освоиме трите бода и да продолжиме кон нашата цел, пласман во некое од европските натпреварувања“, изјави Бојаниќ.
Охрид и Тиквеш досега одиграле десет меѓусебни натпревари и за нијанса подобар е тимот од Кавадарци. Сите дуели меѓу овие два тима биле неизвесни до самиот крај и најчесто победувал оној кој играл пред домашната публика.
Кружниот напаѓач на охриѓани вели дека и овој натпревар ќе биде ист таков, но сепак смета дека е време таа традиција на победи на тимот кој бил домаќин на средбата да биде прекината, односно, Охрид овој пат да слави на гостински терен.
„Како и секој претходен дуел со Тиквеш, така и овој ќе биде тежок и неизвесен. Досега важело дека тимот кој игра дома ќе ја однесе и победата, Тиквеш во Кавадарци, а ние во Охрид, но мислам дека е редно време да се случи брејк во гости. За да го направиме тоа ние мораме да изиграме дисциплинирано во одбрана и да го оставиме срцето на терен. Максимално сме фокусирани на натпреварот и веруваме дека можеме да дојдеме до трите бода“, дециден е Бојаниќ.
На средина од плеј-офот од Супер лигата, Охрид е на 4. место на табелата, последното кое води во Европа, додека Тиквеш, со бод заостанување е на 5. место.
Натпреварот меѓу Тиквеш и Охрид се игра во сабота, 6 април, со почеток во 18:00 часот, во спортската сала „Јасмин“ во Кавадарци.
ПОВРЗАНИ ВЕСТИ
