После двете победи против екипата на Татабања ракометарите на Еурофарм Пелистер се подготвуваат да ја продолжат успешната серија, а тоа треба да биде направено против составот на ГОГ од Данска.
На оваа средба е сигурно дека ќе го нема Кушан кој се повреди против екипата од Унгарија и тој ќе биде надвор од терените извесен период.
„Остваривме големи победи и тие се важни за позицијата и можноста да ја минеме групата, што би бил историски успех за клубот и за македонскиот ракомет. Секако дека сум задоволен, а задоволни се и сите во клубот. Имавме и таканаречени нус-појави, тешка повреда на Кушан и повреда на Мандалиниќ. Плативме висока цена, но на тоа не можевме да влијаеме, повредите се составен дел од спортот и можеме само да се надеваме дека ќе се вратат здрави во тимот и ќе придонесат за екипата. Победите над Татабања се за Кушан и искрено му посакувам да заздрави што е можно побрзо“, вели тренерот на Еурофарм Пелистер, Жељко Бабиќ.
Ривалот од Данска има и неколку репрезентативци кои беа дел од последниот Мундијал и освоија златен медал.
„ГОГ Гудме во својот ростер има четири светски прваци и тоа говори за нивната сила како тим. Сакам да нагласам дека нашите играчи кои помалку играат ќе добијат шанса да ми покажат и мене, и себе и на цела Македонија колку вредат. Мора да веруваме дека можеме да го победиме ГОГ Гудме. И во овој состав со кој ќе настапиме мора да веруваме дека можеме да му се спротиставиме на Данците и натпреварот да заврши во наша полза. Основни фактори за успех на утрешниот натпревар се фанатична волја и верба во себе и во тимот. Ако ги имаме тие две работи имаме шанси во позитивен исход. Во спротивно, ако немаме волја, желба и борбеност, јасно е дека нашите шанси се многу помали“.
Со двете победи против Татабања тимот на Еурофарм Пелистер се доближи до пласман во елиминациите, но ќе мора да се одработи добро и против ГОГ за да се потврди овој пласман.
„Направивме големи чекори кон осминафиналето, натпреварот доаѓа во вистински момент и се радувам на него и покрај проблемите во тимот. Мора да бидеме фанатици, на чело со мене и да веруваме во победа“, коментира тренерот Бабиќ пред утрешниот дуел против ГОГ.
Средбата против ГОГ Гудме се игра утре во салата „Боро Чурлевски“ во Битола, а почнува од 20:45 часот.
ПОВРЗАНИ ВЕСТИ
