Ракометарите на Металург го освоија третото место на 48. издание на Струшкиот турнир, откако во малото финале го совладаа незгодниот состав на Охрид со убедливи 26-31.
Металург го отвори резултатот со голот на Хорват, но потоа десетина минути не успеваше да го совлада Даниловски. Охриѓани беа расположени на стартот, па погодуваа Тот, Кривокапиќ, Чагаљ и Блажески, па Охрид поведе со 5-1.
По тајм-аутот на Кастратовиќ, металурзи се вратија во игра намалија на 7-5, а потоа Канкараш стрелаше за 8-6. Момците на Раде Стојановиќ имаа неколку избрзани напади и грешки, па беа казнети со головите на Поповиќ и Хорват.
По дваесетина минути беше 10-10. Се играше гол за гол во следниот период, а Металург повторно се врати во водство преку Хорват со 12-13. Имаше шанса и за плус три, но не беше искористена, па на пауза се замина со 13-15.
Одличниот Даниловски врза две интервенции и за неполна минута беше 15-15. Охриѓани како да застанаа во тој момент, промашија и пенал, и за пет минути во вториот дел беше 15-19 за Металург, па Стојановиќ мораше да бара тајм-аут.
Кога во 40. минута беше 17-23 за составот од Автокоманда, веќе беше јасно во каков правец ќе се одвива овој натпревар. На охриѓани како да им снема сила и комбинаторика во нападите, кои беа безидејни и се инсистираше на индивидуални решенија.
До крајот се измешаа составите на двете екипи, но разликата остана висока и Металург лесно го доврши натпреварот со конечен триумф, 26-31.
Седмото место на турнирот го освои Еурофарм Пелистер 2 откако славеше над Струга со 23-21, петтото место е за Бутел Скопје по триумфот над Прилеп со 23-25, додека финалето се игра од 21:15 часот меѓу Вардар и Еурофарм Пелистер.
ПОВРЗАНИ ВЕСТИ
