Денеска во просториите на РФМ беше извршена ждрепката за полуфиналето во Купот на Македонија.
Тимот на Еурофарм Пелистер ќе се соочи со Пролет, а тренерот Александар Јовиќ вели дека се игра еден меч на кој нема поправен.
„Купот на Македонија секогаш бил и треба да остане ракометен празник. Еден меч во кој нема поправен, и секоја топка е важна. Некои можеби сметаат дека имаме лесна ждрепка, и ние сме фаворити. Напротив, ние кон нашиот ривал гледаме со голем респект. Пролет е најстар клуб, и последиве години постојано игра важна улога во македонскиот ракомет. Ние ќе се подготвуваме сериозно, и ќе сакаме да го потврдиме нашиот несомнен квалитет. Имаме време да мислиме за Пролет, бидејќи пред нас е друг многу важен натпревар“, вели Јовиќ.
Во второто полуфинале ќе играат Вардар и Алкалоид, а завршниот турнир во Купот во двете конкуренции ќе се игра во СРЦ „Билјанини Извори“.
ПОВРЗАНИ ВЕСТИ
