Екипата на Вардар се враќа од гостувањето во Норвешка со еден бод од првиот натпревар во новата сезона откако денеска одигра нерешено со 27:27. Мартин Томовски беше играчот кој покажа дека е одлично засилување и со 15 одбрани помогна да се освои овој бод иако неговата игра беше клучна за Вардар постојано да биде во игра и за победа.
Од почетокот на средбата тргна надигрувањето на ракометарите на Вардар и Елверум. Домашните отворија со подобра одбрана, расположен голман и 2:0. Сепак, и Вардар имаше што да покаже бидејќи Томовски врати со интервенции и израмни на 2:2.
Оттука тргна најавата за интересен натпревар во кој нијанси ќе решаваат. Вардарци полека ја преземаа иницијативата. Вујовиќ ја бараше поставата и се чини дека после исклучувањето на Моралес и влагањето на игра на Кевин Њокас дојде до спојување на коцките и резултат кој даваше гаранција за интересно продолжение на средбата.
Вардарци почнаа го преземаат водството и извесно време беа на плус два. Во 22. минута дојдоа до 11:8, а веднаш потоа и до 12:8. Овие четири гола даваа надеж за убаво продолжение на средбата, но се чини дека играњето со 7 на 6 придонесе за Вардар да влезе во период на мала криза и грешки при што домаќинот успеа да казни, па на одмор се замина со 13:13.
Вториот период почна одново со криза. Елверум набрзина стигна до 16:13, а првиот гол за Вардар одново беше после пет минути игра. Десетина минути се бараше приклучок, па во 41. минута се обезбеди нерешен резултат и 18:18. Тука средбата влезе во игра гол за гол и постојано следуваше гол како одговор на погодоците на некој од тимовите. Имаше и неколку минути во кои се менуваа во водство.
Одбраната беше клучот и секоја топка беше максимално важна. Мораше да се одигра силно и квалитетно. И двете екипи одново имаа грешки во завршницата, па беше јасно дека ќе решава една топка.
На околу 40 секунди до крајот Вардар доби можност за напад за победа при 27:27, но Гаџа реши да оди на финта и шут од шест метри. Сепак, биеше покрај голот, а за домашните остана време за напад. Во последниот напад и Елверум не успеа откако Томовски го одбрани последниот удар за конечни 27:27.
ЛИГА НА ШАМПИОНИ – ГРУПА А
ТАБЕЛА