Тешка вечер за Вардар, губеше 45 минути од последнопласираното Скопје

Ракометарите на Вардар остварија тешка победа во 12. коло од Супер машката лига против екипата на Скопје чиј отпор го скршија дури во последната четвртина од натпреварот, а на крајот славеа со 32:27.

Шампионот слабо го почна натпреварот, а избраниците на Вујовиќ имаа многу проблеми во организација на нападите и тешко постигнуваа голови. Скопје секоја шанса ја користеше да го совлада голманот Али Сафар. После првите десетина минути Скопје имаше водство од 6:3.

Вардар со три брзи гола израмни на 6:6, но првото водство го имаше дури во 15. минута. Скопје продолжи да игра во добар ритам и повторно беше во предност, така беше и на полувреме кога домашниот тим имаше 15:14.

„Црвено-црните“ имаа добар старт на вториот дел и со серија од четири гола го обезбедија највисокото водство. И покрај негативата од три гола Скопје не се предаде и продолжи во ист ритам како во првото полувреме. Њокас промаши чиста контра што играчите на Скопје го казнија, а потоа и постигнаа гол на празна мрежа за водство од 20:18 во 39. минута.

Вујовиќ побара минута одмор да ги разбуди своите ракометари, веднаш потоа Њокас реализираше за минус еден. Меѓутоа Скопје сигурно ги реализираше своите напади и одржуваше два позитива. Вардар до ново водство од 25:24 стигна откако Георгиевски и Чувара постигнаа два брзи гола.

Во продолжение шампионот го диктираше резултатот и имаше еден гол позитива. Во 54. минута Талески постигна гол за два предност, 28:26, а до крајот вардарци немаа проблеми да го приведат натпреварот до крај и да триумфираат со 32:27.

СУПЕР МАШКА ЛИГА – ТАБЕЛА