Скопје чекаше 14 кола за да се израдува, ги освои првите суперлигашки бодови

После 13 порази ракометарите на Скопје 2020 денеска дојдоа до првата победа во деби сезоната во Супер машката лига откако денеска го совладаа тимот на Радовиш со 27:23.

Ракометарите на Скопје 2020 успеаја да го одработат она што се очекуваше од нив и да дојдат до триумф откако во поголемиот дел од средбата беа во предност и имаа контрола. Иако радовишани покажаа дека знаат како треба да парираат односно да бидат постојано во игра, сепак, недостигаше нешто за да можат да се изборат и за подобар резултат.

Домашните први направија плус три и имаа 7:4. Ја одржуваа разликата до 10:7 во 21. минута, а потоа примија четири гола и влегоа во негатива. На одмор резултатот беше 11:12 што беше најава за второ полувреме во кое ќе мора да се одигра на едно уште повисоко ниво.

Екипата на Скопје подобро го отвори и второто полувреме и тоа со 3:0. Одново имаше предност која постојано се зголемуваше. Предноста беше главно 2-3 гола. Се играше трпеливо и се бараше шанса за гол, а тоа беше добро сработено од страна на домашниот состав.

Скопје не доволи тимот на Радовиш да се доближи одново и да се искомплицираат работите така што постојано беше со контрола на играта и на резултатот. Гостите најмногу се доближија во финишот. Во 57. минута резултатот беше 24:23, а тогаш за три минути беше решено сè и домашните ги освоија бодовите со триумф од 27:23 што конечно им донесе радост.

Дебитантот во Супер машката лига конечно успеа да стигне до триумф во најсилното натпреварување на домашна сцена и сега веќе нема екипи без бодови.

СУПЕР МАШКА ЛИГА – ТАБЕЛА