Неочекувана промена на голманската позиција имаше во Еурофарм Пелистер. На местото на египетскиот голман Карим Хендави, кој се враќа во татковината и ќе брани за Замалек, доаѓа унгарскиот репрезентативен голман Мартон Секељ.
Чуварот на мрежата кој долги години беше член на Малев, ПЛЕР, Балатонфуреди, Чурго, Татабања и Веспрем, во пролетниот дел од сезоната за првпат имаше интернационално искуство во португалскиот Порто.
Позајмицата од Веспрем во Порто му заврши, а му заврши и договорната обврска со унгарскиот гигант. Секељ вели дека имал понуди од повеќе земји, но изборот паднал на македонската.
„Имав понуди од Франција, Германија, Швајцарија и Словенија, но продолжив да размислувам за решение и да сепак да чекам тим што ќе ми даде шанса да имам многу натпревари во сезоната, не само на домашна, туку и на меѓународна сцена. Затоа се решив за Еурофарм Пелистер. Оваа одлука не е важна само за мене, туку и за националниот тим на Унгарија, бидејќи само така ќе можам да останам во форма и во конкуренција за место на Европското првенство“, вели Секељ.
Тој ќе се бори за место во тимот со македонскиот репрезентативец Марко Кизиќ, а веројатно уште еден голман ќе се приклучи на првиот тим на Еурофарм Пелистер. Битолчани ќе бидат активни на четири фронта во новата сезона – во СЕХА лигата, Лигата на Европа, како и во домашното првенство и во Купот на Македонија.
ПОВРЗАНИ ВЕСТИ
