Продолжува хрватската бајка на ЕП, и Романија на колена пред „коцкестите“ дами

На отварањето на главната фаза од Европското првенство за жени, хитот на Хрватска продолжува да реди победи. Откако прелиминарната рунда ја заврши со три победи, триумфираше и во четвртиот натпревар, односно прв од главната рунда, против Романија со 25:20.

Романија добро го започна натпреварот, отвори со 3:1, а потоа и 7:4 и имаше контрола на играта во првите 15. минути. Во 18. минута Полокосер погоди за 8:4 предност на Романија, но тоа беше сè од Романките во првиот дел.

Следуваше фантастична серија на Хрватска од седум последователни гола за пресврт и промена на водството. Хрватките одиграа одлични десет минути во завршницата на првиот дел и обезбедија високо водство на полувреме од 14:10.

Во вториот дел сликата на теренот беше сосема различна од првото полувреме. Хрватска го контролираше резултатот, во 40. минута беше 17:12 и Романија немаше решение за противничката игра. Романките се заканија во 48. минута кога намалија на минус два, 19:17 но немаа сили за пресврт.

Следуваа голови на Мамиќ и Мичијевиќ за повторно одалечување на четири позитива за Хрватска. До крајот на натпреварот со рутинска игра Хрватска стигна до уште една победа и се доближи чекор поблиску до полуфиналето.

Најефикасна во репрезентацијата на Хрватска беше Валентина Блажевиќ со седум гола, додека по четири постигнаа Јежиќ, Калаус и Мичијевиќ. На голот Теа Пијевиќ собра девет успешни интервенции. Во екипата на Романија, Кристина Неагу со шест гола беше прв стрелец.