Куманово ја забележа првата победа сезонава, совладувајќи го Младост Богданци со 25-24 (14-12). Со двата бода кумановци избегаа од дното и сега имаат 3 бода, на 8 место на табелата.

Домаќините испуштија седум гола предност, во второто полувреме и самите бркаа резултат, а решавачкиот погодок го постигна Омар Мамдух на неполна минута до крајот. Гостите имаа шанса во последната минута да израмнат, имаа усте десетина секунди од нападот кога од записничката маса беше сигнализирано за погрешна измена.

Тоа значеше дека наместо Младост во напад, последните десетина секунди домашните ќе ја имаат топката, а играчот Ѓорѓе Атанасов доби исклучување. Таа шанса Куманово не ја испушти и на крај го зачува водството што им донесе победа.

Куманово одлично го отвори натпреварот. По почетните израмнувања, домаќините поведоа со 11-4 и изгледаше дека рано ќе го преземат резултатот под контрола. Младост, сепак, се врати. При 12-6 гостите направија серија од шест гола без одговор и израмнија на 12-12. Куманово го издржа тој налет и на пауза замина со водство од 14-12.

Продолжението донесе нов пресврт. Младост израмни на 16-16, а во 38. минута поведе со 17-16 – првпат по почетните минути. Потоа екипите се менуваа во водство, без ниту една да успее да се одвои. Гостите влегоа во завршницата со 23-21, но Куманово одговори со три последователни гола: Мамдух намали, Бојан Гичев израмни, а Наум Костов од пенал донесе 24-23.

Владимир Бојаниќ, исто така од пенал, израмни на 24-24 во 59. минута. Последниот збор го имаше Мамдух: по додавање од голманот Горан Чавејски, реализираше контранапад за 25-24 на неполна минута до крајот. Резултатот повеќе не се смени.

Мамдух беше најефикасен кај победникот со девет гола. Карим Мохамед Закарија Али постигна шест, а Костов пет. Григор Трајковски запиша осум одбрани, додека Чавејски имаше четири и асистенција за победничкиот гол. Кај Младост се истакнаа Жељко Пеиќ со шест погодоци, како и Тодор Узунчев и Славе Јанковски со по пет. Гостите настапија без Даниел Андоновски, кој беше во составот на претходниот натпревар.

▶▶▶ Приклучи се на VIBER – https://abit.ly/viber-24rakomet
Добивај директно РАКОМЕТНИ ВЕСТИ на твојот мобилен телефон 📲.
Со еден клик до сите вести. 🤾

Тимот на Металопластика, каде што игра македонскиот интернационалец Дејан Кукуловски, бележи одлични резултати во српскиот шампионат.

Металопластика славеше на гостувањето кај Дубочица Лесковац со 31-26 во натпревар од 6 коло во првенството на северниот сосед.

Заедно со Павловиќ и голманот Чировиќ, Кукуловски беше меѓу најдобрите поединци на теренот и успеа да постигне пет гола во противничката мрежа.

Металопластика е прва на табелата со 11 бодови по шест меча, додека Партизан е втор со десет бода, но и натпревар помалку.

Еурофарм Пелистер славеше на гостувањето кај Прилеп со 39-23 (20-14) во седмото коло од ракометната Суперлига. Домаќините имаа добар почеток и поведоа со 4-3, а потоа и со 6-5. По израмнувањето на 9-9, гостите првпат ја презедоа контролата и до полувремето изградија шест гола предност.

Важен период во првиот дел беше серијата со која Еурофарм Пелистер од 16-13 стигна до 20-13. Прилеп не реализира два седмерца во полувремето, а на паузата замина со негатива од 14-20.

На почетокот од продолжението домашниот тим намали на 17-23, но не успеа да го задржи приклучокот. При резултат 18-26 следуваа седум гола по ред за Пелистер, кој поведе со 33-18 и го реши прашањето на победникот. Битолчани во два наврата стигнаа и до највисоки 17 гола предност, пред последниот гол на Прилеп да го постави конечниот резултат. Второто полувреме гостите го добија со 19-9.

Филип Кузмановски беше најефикасен со девет гола, Садоу Нтанзи постигна пет, а Ненад Белистојаноски, Самоил Ристевски, Ник Хенингман и Петар Атанасијевиќ дадоа по четири. Кај Прилеп се истакна Димитар Димитриоски со пет погодоци.

Со новите два бода Пелистер има 13 и моментно се искачува на првото место, пред да се комплетира колото. Прилеп останува на осум бода и на петтото место. Во следното првенствено коло Пелистер ја пречекува Младост, а Прилеп игра дома со Вардар.

▶▶▶ Приклучи се на VIBER – https://abit.ly/viber-24rakomet
Добивај директно РАКОМЕТНИ ВЕСТИ на твојот мобилен телефон 📲.
Со еден клик до сите вести. 🤾

Ракометарите на Радовиш прославија триумф над Текстилец со 30-25 во натпревар од 6 коло во прволигашката конкуренција.

Иако се очекуваше поголем отпор од штипјани, сепак домаќините лесно стигнаа до двата бода на оваа пресметка, а во преден план беше левиот бек Васе Петров, кој постигна девет гола против „своите“ штипјани.

Покрај него, во нападот на радовишани се истакнаа Иванче Ончев со осум и Филип Костадинов со пет погодоци.

Домашните поведоа со 12-5, Текстилец за момент се врати на минус еден, 12-11, но на паузата Радовиш замина со предност од три гола, 15-12.

Во второто полувреме радовишани диктираа темпо и имаа резултатска контрола, па гостите немаа шанси за камбек во натпреварот.

Најдобри стрелци во штипскиот состав беа Лазар Стојанов, кој се врати во тимот по еден меч суспензија и даде осум гола, како и Јован Величков, кој стрелаше четири пати.

Ракометарите на Бутел Скопје загубија со 27-24 од хрватскиот состав Горица во првиот натпревар од второто коло во ЕХФ Европскиот Куп. Иако можеа да се вратат со подобар резултат, сепак во последните десетина минути домашните успеаја да го свртат резултатот во своја корист и по водството на Бутел со 23-21, направи голем пресврт, со серија од 6-1.

Стартот не беше ветувачки за скопскиот состав. По 2-2, Горица се одлепи на плус четири, 7-3, а во првите петнаесетина минути водеше и со пет гола, 11-6. Сепак бутелци навреме се разбудија.

Во финишот на полувреме ја стегнаа одбраната, по 13-10 за домашниот тим, четири минути гостинската одбрана не дозволи погодок, а за тоа време Марковски и Стаменковиќ погодија за минимална негатива на паузата, 13-12.

Вториот дел тргна со три гола на домашните за 16-12, а Горица остана без Дражен Огулиќ, кој доби директен црвен картон по опасниот старт над Тодески. Но момците на Стоилов возбратија на уште подобар начин.

Со серија од пет гола по ред и со одбрани на Чаневски, Бутел направи комплетен пресврт, 17-16, имаше и напад за плус два, кој не го реализира, па Горица казни со голови за 18-17.

Беше 18-18, но како одминуваше времето така Бутел ја преземаше контролата на теренот. На 20-20, Стоилов побара тајм-аут, а по интервенциите на Чаневски, Бутел за првпат водеше со два гола, 23-21, а имаше и напад за плус три со играч повеќе.

Сепак тој не беше реализиран и казната стигна на спротивната страна, па Горица успеа да израмни 23-23. Двете екипи во продолжение промашија по два пати, а домашните преку Пит ја вратија предноста на своја страна.

Капитенот Ѓоргиевски беше исклучен, тоа го искористи Горица и на две минути до крај отиде на плус два, 25-23, па Стоилов мораше да бара тајм-аут. Костов ја прекина „црната серија“ на Бутел и намали на 25-24.

Дујиќ одново ја однесе Горица на плус два, 26-24, бутелци погрешија и останаа уште дваесетина секунди за хрватскиот состав за напад. Успеаја да организираат напад и на крајот прославија триумф со три гола, 27-24. Во составот на Бутел по четири пати погодија Николоски, Субашевски и Стаменковиќ, а кај домашните се истакна Цековиќ со пет погодоци. На голот на Бутел одличен беше Чаневски.

Реваншот ќе се одигра во Скопје на 24 октомври од 17:00 часот.