Ракометарите на Бутел Скопје вечерва од 18:00 часот ќе го одиграат првиот натпревар во ЕХФ Европскиот Куп на гости кај хрватската Горица.

Станува збор за незгоден ривал, кој има одличен старт во Хрватска – шест победи на шест меча, меѓу кои и онаа над Сесвете, учесник во Лигата на Европа и тоа на гостински терен.

Десното крило Максимилијан Гуриќ очекува тежок натпревар.

„Во Европскиот куп го пречекуваме Бутел Скопје, млада македонска екипа во чии редови има искусни поединци. Нè очекува тежок противник и натпревар во кој ништо нема да добиеме без борба. Во овој густ распоред важно ни е добро да го отвориме дуелот и да покажеме дека никој не поминува лесно низ нашата сала. Затоа ги повикуваме сите навивачи: дојдете, исполнете ги трибините и подгответе им на гостите што е можно потешка атмосфера. Вие сте нашиот осми играч“, порача десното крило.

Тренерот на Горица, Матеј Мишковиќ, вели дека Бутел Скопје заслужува целосен респект.

„Пред нас е голем европски натпревар и предизвик на кој сите во клубот исклучително му се радуваме. Ни гостува Бутел од Скопје, квалитетна и сериозна екипа која заслужува целосен респект. Свесни сме дека нè очекува тежок натпревар против противник кој има квалитет и амбиции. Сепак, ние имаме свои цели и веруваме во она што го работиме. Од почетокот на сезоната градиме победнички менталитет, а ваквите натпревари се можност да покажеме колку вредиме и колку можеме да постигнеме како тим. Сакаме да бидеме храбри, одлучни и да го наметнеме нашиот начин на игра од првата минута. Играме на домашен терен, пред нашите навивачи, и немаме намера никому да му ја препуштиме улогата на фаворит, без оглед на името на противникот.
Го почитуваме Бутел, но веруваме во сопствениот квалитет. Нашата цел не е само да учествуваме во европското натпреварување, туку да бидеме конкурентни, да победуваме и да направиме исчекор на европската сцена со Горица“, заврши Мишковиќ.

Еурофарм Пелистер славеше на гостувањето кај Прилеп со 39-23 (20-14) во седмото коло од ракометната Суперлига. Домаќините имаа добар почеток и поведоа со 4-3, а потоа и со 6-5. По израмнувањето на 9-9, гостите првпат ја презедоа контролата и до полувремето изградија шест гола предност.

Важен период во првиот дел беше серијата со која Еурофарм Пелистер од 16-13 стигна до 20-13. Прилеп не реализира два седмерца во полувремето, а на паузата замина со негатива од 14-20.

На почетокот од продолжението домашниот тим намали на 17-23, но не успеа да го задржи приклучокот. При резултат 18-26 следуваа седум гола по ред за Пелистер, кој поведе со 33-18 и го реши прашањето на победникот. Битолчани во два наврата стигнаа и до највисоки 17 гола предност, пред последниот гол на Прилеп да го постави конечниот резултат. Второто полувреме гостите го добија со 19-9.

Филип Кузмановски беше најефикасен со девет гола, Садоу Нтанзи постигна пет, а Ненад Белистојаноски, Самоил Ристевски, Ник Хенингман и Петар Атанасијевиќ дадоа по четири. Кај Прилеп се истакна Димитар Димитриоски со пет погодоци.

Со новите два бода Пелистер има 13 и моментно се искачува на првото место, пред да се комплетира колото. Прилеп останува на осум бода и на петтото место. Во следното првенствено коло Пелистер ја пречекува Младост, а Прилеп игра дома со Вардар.

▶▶▶ Приклучи се на VIBER – https://abit.ly/viber-24rakomet
Добивај директно РАКОМЕТНИ ВЕСТИ на твојот мобилен телефон 📲.
Со еден клик до сите вести. 🤾

Еден од најголемите трансфер-случаи во европскиот ракомет продолжува да се развива. Јоханес Гола, кој летово се пресели од Фленсбург во Мелсунген, ја повлекол вонредната изјава со која бараше предвремено раскинување на договорот.

▶▶▶  Добивај директно РАКОМЕТНИ ВЕСТИ на твојот мобилен телефон
Приклучи се на VIBER – https://abit.ly/viber-24rakomet . Со еден клик до сите вести.

Тоа, сепак, не значи дека се откажал од заминување. Гола и натаму сака да се врати во Фленсбург, клубот во кој мина осум години и во кој четири сезони беше капитен. Сега решение се бара преку директни преговори меѓу двата клуба.

Фленсбург веќе направил конкретен чекор. Според информациите на германската агенција ДПА, клубот понудил околу 700.000 евра за предвремено ослободување на Гола од договорот.

Мелсунген ја одбил понудата. Германските извори наведуваат дека клубот бара милионска сума за да се согласи на предвремена разделба со играч кој има договор до летото 2031 година. Тоа е и разбирливо од спортски аспект. Мелсунген го донесе Гола како еден од клучните играчи на новиот проект, а тој во клубот пристигна дури во јули годинава.

Само неколку месеци подоцна, ситуацијата целосно се промени. Дополнителна компликација е клаузулата во договорот на германскиот пикер. Според „Sport Bild“, во договорот е предвидена откупна сума од 500.000 евра плус данок, која важи ако интерес покажат шест конкретни клубови – Фленсбург, Барселона, Келце, ПСЖ, Рајн Некар Левен и Кил.

Но токму околу тоа кога може да биде активирана клаузулата постои правна дилема. Во документот стои дека можноста може најрано да стапи во сила на 30 јуни 2028 година, додека различни страни различно го толкуваат останатиот дел од формулацијата. Ако Мелсунген не обезбеди европски настап, предвидената сума се намалува на 375.000 евра.

Поради тоа трансферот за летото 2027 – или евентуално уште порано, не може едноставно да биде реализиран со активирање на клаузулата. Засега мора да има договор меѓу клубовите.

Капитенот на Германија претходно јавно објасни дека причините за неговата желба се семејни. Гола призна дека одлуката да потпише за Мелсунген била донесена многу порано, а во меѓувреме животните околности на неговото семејство се промениле.

Во својата јавна реакција тој нагласи дека ситуацијата веќе не е само прашање на носталгија и дека сериозно влијае врз неговата ментална состојба. Мелсунген потоа потврди дека причините за неговото барање се поврзани исклучиво со семејната ситуација. Гола продолжи нормално да тренира и да настапува за Мелсунген и покрај целата ситуација.

▶▶▶  Добивај директно РАКОМЕТНИ ВЕСТИ на твојот мобилен телефон
Приклучи се на VIBER – https://abit.ly/viber-24rakomet . Со еден клик до сите вести.