Суперлигашот Вардар Неготино, кој во продолжението од сезоната ќе се бори за опстанок во македонската елита, го ангажираше првото странско засилување за натпреварите од плеј-аут фазата.
Ново име во редовите на Вардар Неготино е искусниот Лазар Адамовиќ, кој настапува на позицијата десен бек и има големо интернационално искуство.
Српскиот интернационалец во својата кариера настапуваше во Шпанија, Грција, Италија, Кувајт, како и во Македонија.
27-годишниот ракометар две сезони го носеше дресот на Охрид и заедно со македонскиот тим во сезона 2017/18 учествуваше на европска сцена.
Вардар Неготино во битката за опстанок ќе игра со екипите на Радовиш, Куманово, Прилеп, Струга, Јуниор КВ, Скопје и Голден Арт.
Клубот во продолжението од сезоната ќе биде предводен од старо-новиот тренер Петар Ангелов, откако по завршувањето на првиот дел од сезоната си замина Владимир Глигоров.
ПОВРЗАНИ ВЕСТИ
