Екипата на Келце дојде до петтата победа во Лигата на шампионите во новата натпреварувачка сезона, откако на свој терен немаше големи проблеми против ПИК Сегед триумфирајќи, со резултат 37:30, во натпревар од групата Б. За ПИК Сегед денешниот пораз беше петти и унгарскиот вицепрвак останува на 6. позиција на табелата.
Полскиот шампион имаше фуриозен старт во дуелот против екипата од Унгарија. Ракометарите на Талант Душебаев во воведниот дел поведоа со 3:0, потоа имаа 7:2 и по десет минути игра дојдоа до резултатска предност од плус седум, 10:3. До тој момент, ракометарите на ПИК Сегед имаа седум промашени удари, додека домаќините само еден нереализиран напад. Кризата во ПИК Сегед продолжи и во понатамошниот тек од дуелот и како одминуваше времето така домашниот тим беше се повеќе сигурен во нападите и лесно доаѓаше до погодок.
Веќе кон средината на првото полувреме резултатот беше двоцифрен, односно 16:6 за Келце. ПИК Сегед се обидуваше да намали дел од резултатската негатива, дојде до минус седум негатива во 20 минута, 17:10, но тимот на Келце не дозволуваше ПИК Сегед да се доближи и на полувреме замина со активен резултат од 22:14. Голманот на Келце, Андреас Волф првиот дел го заврши со 10 одбранете удари, а во спротивниот табор Мирко Алиловиќ имаше само четири интервенции.
Ниту во вторите 30 минути немаше неизвесност. Келце рутински чекореше кон нова победа и со расположените Морито и Сичко лесно се справуваше со одбраната на унгарскиот тим. Во 40 минута предноста на Келце беше 29:18 и во последните 20 минути од дуелот ПИК Сегед ја искористи опуштеноста во редовите на домашниот табор и се избори за поблаг пораз.
Најефикасни во победничката екипа беа Симон Сичко и Акрадиуш Морито со по седум погодоци. Во поразениот табор листата на стрелци беше предводена од Мартинес Мигел и Иманол Алустиза, кои имаа по пет реализации.