Тројца македонски репрезентативци вечерва беа на терените во Бундес лигата. Единствениот кој се израдува на победа беше Жарко Пешевски со Штутгарт кој славеше на гостувањето кај Нордхорн со 29:26.
Штутгарт потполно доминираше на овој натпревар и сосема заслужено ги освои бодовите кои значат многу за обезбедување опстанок. Веќе на полувреме ја најавија победата кога водеа со 17:11, а во продолжение само ја потврдија победата. Жарко Пешевски постигна еден погодок.
Мартин Томовски со Лудвигсхафен имаше тешко гостување кај Магдебург каде што забележа убедлив пораз со 29:37. Фаворитот на мечот ја оправда улогата и без проблеми стигна до победата.
На полувреме Магдебург водеше со 23:14 и практично ја имаше обезбедено победата после 30 минути. Мартин Томовски бранеше нешто повеќе од 30 минути и забележа седум интервенции.
Филип Миркуловски со Вецлар доживеа нов пораз откако загубија на гостувањето кај Балинген со 28:30. Иако на полувреме Вецлар водеше минимално со 17:16, сепак, до крај Балинген направи пресврт и стигна до многу важна победа во борбата за опстанок. Филип Миркуловски не успеа да постигне гол, а имаше една аситенција.
ПОВРЗАНИ ВЕСТИ
