Ракометарите на Драчево триумфираа против Куманово со убедливи 38:29 во рамките на последното, 14. коло од плеј-оф групата во Првата лига. Со победата над Куманово, Драчево завршува на третото место.
Драчево уште на самиот почеток ја оправда фаворитската улога и без проблеми водеше во текот на целиот натпревар. Гостите од Куманово, кои настапија само со девет ракометари имаа сили за првите десетина минути при негатива од 5:4, а во преостанатиот дел ракометарките на Велимир Настески доминираа на теренот. На полувреме, Драчево имаше предност од девет гола разлика, 21:12.
Во второто полувреме дојде до опуштање на домаќините и нивната лоша игра беше целосно искористена од страна на Куманово.
Иако разликата беше голема, кумановци намалија на само пет гола разлика, 29:24, на десет минути до крајот на натпреварот. Сепак, Драчево не попушти до крајот и ја врати разликата од првиот дел. Куманово со краткиот ростер целосно падна во последниот дел и мораше да го прифати денешниот пораз.
Најефикасен во составот на Драчево беше Иван Ангелов со десет гола. Во составот на гостите, Андреј Миладиновски беше прв стрелец со девет погодоци.
ПОВРЗАНИ ВЕСТИ
