Дебитантот лесно мина со Куманово

Тимот на Алкалоид, кој оваа сезона за првпат игра во суперлигашката конкуренција ја забележа втората победа. Избраниците на Кире Лазаров славеа на гостувањето кај Куманово со убедливи 40-26.

Домаќинот успеваше да парира во првите десетина минути, кога беше 5-6. Иваноски и Кофилоски погодија за 5-8, а клучната серија беше направена при резултат 7-10. Гостите стрелаа четири пати по ред за 7-14 и веќе се наѕираше победникот. На паузата беше 10-19.

Како што заврши првото полувреме, така започна и вториот дел. Новиот суперлигаш ги казнуваше сите грешки на кумановци со брзи погодоци и не дозволи да биде загрозена предноста. Ја оддржа и ја зголеми до конечните плус 14, 40-26.

Најдобри стрелци во победничкиот состав беа крилата Александар Стојков со осум, како и Дарио Кофилоски и Александар Петковски со по пет гола, додека кај Куманово се истакна Вучко Мрвовиќ со девет погодоци, а Јован Даневски додаде уште пет.