Ракометарите на Голден Арт по поразот во претходното коло од Јуниор КВ, денес беа убедливи против Металург РА и славеа со резултат 38:20 во натпревар од 11. коло во Првата лига од Групата Б.
Домаќините предводени од искусниот Илиев имаа добро отворање во воведиот дел и солидно водство од 5:3. Екипата од Автокоманда за момент намали на минус еден, 4:5, но избраниците на Никола Матлиески со добрата одбрана и успешната реализација во нападите полека ја зголемуваа својата предност која во 20. минута изнесуваше 12:6.
Ракометарите на Миле Бочкаровски преку Георгиевски и Неданоски ја намалија негативата на минус четири, 8:12. Со иста мера одговорија домаќините, врзаа два гола во низа и на неполни пет минути пред крајот на првиот дел имаа сигурна предност од 14:8. Голден Арт на пауза замина со плус седум гола разлика, 17:10.
Во вториот дел, Металург РА до 35. минута постигна четири погодоци, а во својата мрежа прими два. Сепак, поискусната екипа на Голден Арт за само неколку минути повторно дојде до плус седум, 21:14. Преку Гучески и Пасковски, домашната екипа го обезбеди највисокото водство од 28:16 во 45. минута. Голден Арт до последната секунда ја зголемуваше својата предност и на крајот прослави убедлива победа од 38:20.
Најефикасен во Голден Арт беше Ивица Илиев со осум погодоци, сите во првото полувреме, додека по шест постигнаа Симон Гучески и Никола Димитров. Во екипата на Металург РА се истакна Христијан Неданоски со четири погодоци.
ПОВРЗАНИ ВЕСТИ
