Тимот на Овче Поле Славјански Универзитет славеше во драматичен натпревар на гостински терен кај Деспина со 23-22. Иако гостинките влегоа со плус четири во финишот, 19-15, упорните домаќинки успеаја да намалат на гол негатива и да внесат неизвесност.
Во последната минута гостинките од Свети Николе имаа плус два 23-21, пред Цаневска да намали од пенал. Следуваше нова нереализирана акција на Овче Поле СУ, но и Конеска промаши на спротивната страна. Уште еднаш напаѓаа гостинките, згрешија, па Деспина доби шанса барем за бод, но топката од голманката Чурлиновска не заврши во вистинските раце и шансата пропадна, па почна радоста на Овче Поле СУ.
Најдобри стрелци кај победникот беа Анастасија Сентовска со осум и Јована Ангеловска со шест гола, додека кај Деспина по три погодоци имаа Мери Гичева, Маја Ристеска, Сања Цветкоска и Евгенија Цаневска.
Ракометарките на Стружанка ја прекинаа серијата порази и славеа на гостински терен кај составот на Шампион со убедливи со 35-19.
Немаше никаква неизвесност на овој дуел, а предводник на гостинките беше Теодора Маркоска со 12 гола, додека Елена Лушеска и Маја Раткушиноска погодија по шест пати. Во составот на Шампион по пет реализации имаа Ангела Петровска и Ивона Ивановска.
Битолски Пелистер по ремито со прилепчанки, славеше на гостувањето кај Ѓорче Петров 2 со 29-21, а победникот беше најавен уште од стартот. Гостинките до паузата стигнаа до плус четири, 13-9.
Вториот дел беше само рутинско одработување на задачата. Најдобри кај гостинките беа Дамјановска со седум и Босилковска со шест погодоци, а по пет за Ѓорче Петров 2 постигнаа Антонела Ѓероска и Марија Димоска.
Женска лига, плеј-аут, 5 коло:
Шампион – Стружанка 19-35
Ѓорче Петров 2 – Пелистер 21-29
Деспина – Овче Поле СУ 22-23
Спартак слоб.
Табела
1.Деспина 9
2.Спартак 8
3.Пелистер 7
4.Ѓорче Петров 2 6
5.Овче Поле СУ 6
6.Стружанка 3
7.Шампион 0
