Екипата на Овче Поле победнички го започна настапот во плеј-оф фазата од прволигашката конкуренција, откако на гостувањето во Скопје против истоимената екипа триумфираше со 30:29.
Клубот од Свети Николе, кој во регуларниот дел од сезоната оствари шест победи, три ремија и претрпе пет порази, во плеј-офот пренесе пет бода. Со освоената победа во Скопје, сега има вкупно седум бодови.
Откако резултатот беше израмнет на 6:6, гостите врзаа три гола во низа и се одлепија на 9:6. Потоа казнија неколку грешки на домаќинот и во неколку наврати имаа предност и до плус шест. Сепак, Скопје за момент се консолидираше, а по 30 минути игра резултатот беше 17:13 за гостинската екипа.
Во второто полувреме, Овче Поле речиси до последната минута ја одржуваше предноста. Во еден момент водеше и со плус седум, но како што се приближуваше финишот, така домаќините ја анулираа негативата и најавуваа неизвесност.
По водството на гостите од 27:21, избраниците на Будимир со серија од 5:0 се вратија во игра и намалија на 27:26. Гостинскиот тим си направи од готово – вересија, па така Скопје на дваесетина секунди пред крајот ја искористи ситуацијата со двајца играчи повеќе и израмни на 29:29. Победничкиот гол за Овче Поле го постигна Димчевски од пенал за голема радост на гостинската клупа.
Најефикасни во победничката екипа беа Стојанче Ристов со осум и Иван Димчевски сос седум погодоци. Кај Скопје се истакнаа Дион Земон со девет и Андреј Кочески со осум реализации.
