Денеска во спортската сала „Автокоманда“ ќе се одигра Ф4 турнир од машкото кадетско првенство. За трофејот во кадетската машка лига ќе се борат четири екипи – Алкалоид, Бисинов, Еурофарм Пелистер 2 и Струга.
Тоа значи дека ќе имаме нов шампион кај кадетите, бидејќи во ланската сезона првото место го освои Мулти Есенс, кој во оваа сезона не успеа да обезбеди пласман меѓу најдобрите четири кадетски екипи, откако во бараж дуелот беше елиминиран од Бисинов.
На ланскиот Ф4, кој исто така беше одржан во „Автокоманда“, освен Мулти Есенс, играа уште Струга, Еурофарм Пелистер и Голден Арт. Стружани сега се надеваат на освојување на златниот медал, во ланската сезона немаа многу среќа во финалето со Мулти Есенс.
,,За ривал во полуфиналето го имаме тимот на Алкалоид, кој на Ф4 турнирот ја има домаќинската улога. Станува збор за еден од најдобрите кадетски тимови во Македонија, ќе биде тешко, но се надевам дека ќе одиграме според посакуваното и ќе дојдеме до финале. Не знаеме многу информации, но според резултатите и играчите кои ги имаат, пак ќе кажам дека станува збор за квалитетен тим”, вели Жарко Ферукоски, тренерот на Струга.
Фарук Мемиќ, кој е тренер на Еурофарм Пелистер 2, се надева дека неговите избраници ќе изборат финале.
,,Втора сезона по ред нашиот кадетски тим на генерација 2006/07 обезбедува учество на завршниот Ф4 турнир за шампион на Македонија во наведената категорија. За разлика од минатата сезона каде преку бараж натпревар обезбедивме учество, оваа сезона како првопласирана екипа во групата Б беше обезбедено дирекно учество на завршниот турнир. Нашите очекувања од истиот се, да напредуваме степен погоре со пласман во финале најмалку, за разлика од минатата сезона каде што го освоивме третото место“, вели Мемиќ.
Од Бисинов очекуваат неизвесни полуфинални дуели, сметаат дека сите четири екипи имаат подеднакви шанси за пласман во финалето.
,,Очекуваме пред сѐ дека овој Ф4 ќе биде доста изедначен по квалитет и очекуваме дека секој натпревар ќе биде изедначен до самиот крај затоа што играат во моментов најдобрите 4 кадетски екипи, им посакуваме среќа на сите екипи и нека победи најдобриот”, истакнаа од велешкиот тим.
ГЛЕДАЈТЕ ГИ ВО ЖИВО СИТЕ НАТПРЕВАРИ ОД Ф4 КАДЕТСКАТА МАШКА ЛИГА
Полуфинале
11:00 часот – СТРУГА – АЛКАЛОИД
Полуфинале
13:30 часот – БИСИНОВ – ЕУРОФАРМ ПЕЛИСТЕР 2
НАТПРЕВАР ЗА 3-то МЕСТО
17:00 часот
ФИНАЛЕ
19:30 часот
ПОВРЗАНИ ВЕСТИ
