Португалскиот голман Мигуел Еспиња одигра маестрално, и со своите одбрани директно влијаеше Вардар да триумфира 34-26 (15-13) против градскиот ривал од другата страна на реката Вардар во првиот меч од разигрувањето за титулата.
Заедно со бекот Вуко Борозан, голманот на Вардар имаше симултанка и им донесе голема радост на навивачите на речиси полната сала во „Јане Сандански“.
Онаму каде застана Еспиња продолжи Гогов кој и во последната секунда го одбрани пеналот на Серафимов. Вардар покажа карактер, и кога има слаби минути и кога има лош ден на некој играч, знае да извлече максимум.
Второто полувреме Вардар го доби убедливо, потврдувајќи дека има и подобри индивидуалци и тим. Не многу атрактивен ракомет, без многу акции и со повеќе индивидуални решенија, со одбрана на „линија на исклучување“.
Кирил Лазаров не успеа по вторпат по ред да го победи Вардар, ниту пак да ја прочита нивната игра. Се обидуваше постојано да го менува тимот, им даде шанса на многумина кои најчесто влегуваат само кога тимот води со голема разлика, и сега беше принуден да смени нешто. Тоа тешко одеше, Вардар имаше подобри индивидуaлци, подобра клупа и тактика која носеше резултат.
Едноставно Вардар покажа дека ќе биде повеќе од сериозен кандидат за титулата. Остануваат уште девет кола за играње. Вуко Борозан имаше девет гола, Еспиња 15 одбрани, а Горига седум гола за Вардар. Кај гостите Серафимов погоди осум пати.
Во следното коло Вардар ќе игра со Бутел Скопје, а „сините“ од Автокоманда го пречекуваат Тиквеш.
