Русија и Белорусија направија нов чекор кон враќање во европскиот ракомет. ЕХФ потврди дека двете федерации можат да се регистрираат за европските натпреварувања и за европските квалификации за светските првенства, но нагласи дека регистрацијата не значи и автоматско право на настап.
По повеќе од четири години суспензија, Русија и Белорусија се сè поблиску до повторно учество во натпреварувањата под капата на ЕХФ. Европската ракометна федерација потврди дека по одлуката на ИХФ за целосна реинтеграција на руските и белоруските селекции, Извршниот комитет на ЕХФ ја одобрил можноста двете федерации да се регистрираат за европските натпреварувања и за европските квалификации за Светските првенства.
Сепак, клучната реченица од ЕХФ е: Регистрацијата не значи автоматско учество.
Од ЕХФ појаснија дека пред конечна одлука ќе бидат земени предвид меѓународната ситуација, евентуалните одлуки на Спортскиот арбитражен суд, безбедносните прашања, можноста за организирање натпревари низ Европа и организациските аспекти на секое натпреварување.
Разликата меѓу ИХФ и ЕХФ во моментов е важна. ИХФ на 15 јули ја укина забраната воведена во март 2022 година и одлучи целосно да ги реинтегрира руските и белоруските репрезентации, официјални лица и судии во своите натпреварувачки циклуси. Одлуката беше донесена по промените во препораките на Меѓународниот олимписки комитет.
ЕХФ, пак, оди чекор по чекор. На состанокот на Извршниот комитет во Букурешт беше дозволена можност за регистрација, но европската федерација го задржа правото дополнително да одлучува дали и под кои услови натпреварите навистина ќе се играат.
Тоа значи дека Русија и Белорусија сè уште не се официјално вратени во европските квалификации, но за првпат е отворен формален пат тоа да се случи. Отворено останува и прашањето под каков статус евентуално би настапувале Русија и Белорусија во натпреварувањата на ЕХФ.
Прашањето до европската федерација било конкретно – дали селекциите би се вратиле со своето знаме и химна, како што ИХФ ја укина претходната забрана.
ЕХФ засега не даде дефинитивен одговор за тоа, туку повтори дека конечниот прием во конкретните натпреварувања ќе зависи од дополнителна проценка.
▶▶▶ Приклучи се на VIBER – https://abit.ly/viber-24rakomet
Добивај директно РАКОМЕТНИ ВЕСТИ на твојот мобилен телефон 📲.
Со еден клик до сите вести. 🤾
