Партизан би можел да направи сензационален потег пред стартот на новата сезона. Белградскиот клуб сериозно размислува за ангажман на искусниот дански репрезентативец Микаел Дамгард, објави „Handball Basse“, а потоа потврди и „Моцарт Спорт“.
Причината е неизвесноста околу здравствената состојба на Владислав Кулеш, најскапото и најзвучно засилување на Партизан во летниот преоден рок.
Иако од клубот неодамна уверуваа дека белорускиот лев бек ќе биде подготвен за стартот на Лигата на шампионите, ситуацијата очигледно сè уште не е целосно јасна.
Дамгард би можел да стане првиот Данец во историјата на српскиот ракомет, а зад себе има исклучително богата кариера – олимписки првак во 2016, светски првак во 2023, а со Магдебург освои титули во Германија и во Лигата на шампионите.
Дамгард последно настапуваше за данскиот ХОЈ, кој испадна од елитата. Во текот на летото кратко беше дел и од проектот во Лос Анџелес, а требаше кариерата да ја продолжи во Кувајт, но тој трансфер не се реализираше.
Доколку Партизан успее да го доведе, белградскиот клуб би добил огромно искуство и дополнителен квалитет пред настапот во Лигата на шампионите.
_________________________________________________________________________________________
▶▶▶ Добивај директно РАКОМЕТНИ ВЕСТИ вести на твојот мобилен телефон, приклучи се на Viber групата на семејството на 24ракомет. Со еден клик до сите вести.
_____________________________________________________________________________________________________
