Ракометарите на Бутел Скопје вечерва од 18:00 часот ќе го одиграат првиот натпревар во ЕХФ Европскиот Куп на гости кај хрватската Горица.

Станува збор за незгоден ривал, кој има одличен старт во Хрватска – шест победи на шест меча, меѓу кои и онаа над Сесвете, учесник во Лигата на Европа и тоа на гостински терен.

Десното крило Максимилијан Гуриќ очекува тежок натпревар.

„Во Европскиот куп го пречекуваме Бутел Скопје, млада македонска екипа во чии редови има искусни поединци. Нè очекува тежок противник и натпревар во кој ништо нема да добиеме без борба. Во овој густ распоред важно ни е добро да го отвориме дуелот и да покажеме дека никој не поминува лесно низ нашата сала. Затоа ги повикуваме сите навивачи: дојдете, исполнете ги трибините и подгответе им на гостите што е можно потешка атмосфера. Вие сте нашиот осми играч“, порача десното крило.

Тренерот на Горица, Матеј Мишковиќ, вели дека Бутел Скопје заслужува целосен респект.

„Пред нас е голем европски натпревар и предизвик на кој сите во клубот исклучително му се радуваме. Ни гостува Бутел од Скопје, квалитетна и сериозна екипа која заслужува целосен респект. Свесни сме дека нè очекува тежок натпревар против противник кој има квалитет и амбиции. Сепак, ние имаме свои цели и веруваме во она што го работиме. Од почетокот на сезоната градиме победнички менталитет, а ваквите натпревари се можност да покажеме колку вредиме и колку можеме да постигнеме како тим. Сакаме да бидеме храбри, одлучни и да го наметнеме нашиот начин на игра од првата минута. Играме на домашен терен, пред нашите навивачи, и немаме намера никому да му ја препуштиме улогата на фаворит, без оглед на името на противникот.
Го почитуваме Бутел, но веруваме во сопствениот квалитет. Нашата цел не е само да учествуваме во европското натпреварување, туку да бидеме конкурентни, да победуваме и да направиме исчекор на европската сцена со Горица“, заврши Мишковиќ.

Еурофарм Пелистер славеше на гостувањето кај Прилеп со 39-23 (20-14) во седмото коло од ракометната Суперлига. Домаќините имаа добар почеток и поведоа со 4-3, а потоа и со 6-5. По израмнувањето на 9-9, гостите првпат ја презедоа контролата и до полувремето изградија шест гола предност.

Важен период во првиот дел беше серијата со која Еурофарм Пелистер од 16-13 стигна до 20-13. Прилеп не реализира два седмерца во полувремето, а на паузата замина со негатива од 14-20.

На почетокот од продолжението домашниот тим намали на 17-23, но не успеа да го задржи приклучокот. При резултат 18-26 следуваа седум гола по ред за Пелистер, кој поведе со 33-18 и го реши прашањето на победникот. Битолчани во два наврата стигнаа и до највисоки 17 гола предност, пред последниот гол на Прилеп да го постави конечниот резултат. Второто полувреме гостите го добија со 19-9.

Филип Кузмановски беше најефикасен со девет гола, Садоу Нтанзи постигна пет, а Ненад Белистојаноски, Самоил Ристевски, Ник Хенингман и Петар Атанасијевиќ дадоа по четири. Кај Прилеп се истакна Димитар Димитриоски со пет погодоци.

Со новите два бода Пелистер има 13 и моментно се искачува на првото место, пред да се комплетира колото. Прилеп останува на осум бода и на петтото место. Во следното првенствено коло Пелистер ја пречекува Младост, а Прилеп игра дома со Вардар.

▶▶▶ Приклучи се на VIBER – https://abit.ly/viber-24rakomet
Добивај директно РАКОМЕТНИ ВЕСТИ на твојот мобилен телефон 📲.
Со еден клик до сите вести. 🤾

Ракометарите на Бутел Скопје го одработија последниот тренинг пред првиот натпревар од второто коло од ЕХФ Европскиот Куп против хрватската Горица.

Во градската сала во Велика Горица, тренерот Стојанче Стоилов и неговите избраници ја скроија тактиката за утрешната пресметка.

Натпреварот меѓу Горица и Бутел Скопје се игра утревечер од 18:00 часот во градската сала во Велика Горица, а судии се Словенците Сатлер и Пукшиќ.

Ова ќе биде петти настап во Европа за македонскиот претставник, откако претходно играше двапати во Лигата на Европа и двапати во ЕХФ Европскиот Куп.

Тимот на Чаир доби ривал по мерка во третото коло од ЕХФ Европскиот Куп – ќе игра против составот на Азербејџан. Станува збор за шампионот на оваа земја, но од сезоната 2024/2025, бидејќи минатата сезона не беше довршена и оваа земја официјално нема шампиони ниту во машка, ниту во женска конкуренција.

Кур испиша историја оваа сезона со пласманот во третата рунда од ЕХФ Европскиот Куп, бидејќи во четвртото учество, успеа да мине едно коло. Ривал беше кипарскиот Апоел, а на двата меча што се игра во Азербејџан, славеше Кур со 40-18 и 39-13.

Во претходните три сезони, Кур беше елиминиран од италијанскиот Салерно, грчкиот Јонијас и португалскиот Сао Педро, со пет убедливи порази и само едно реми.

Tимот на Кур потекнува од градот Мингачевир, петти град по големина во Азербејџан, а натпреварите ги игра во „Олимписки центар“. Името го доби по реката Кура, која го дели градот на две половини, а oд главниот град на Азербејџан, Баку, е оддалечен околу четири часа возење.

На претходните два меча со Апоел од Кипар, кои се игра во Мингачевир, имаше по околу 600 гледачи. Ова се единствените два меча што ги има одиграно Кур во оваа сезона, па Чаир од таа гледна точка, ќе има голема предност, бидејќи е веќе во натпреварувачка форма. Минатата сезона првенството беше прекинато поради лошата финансиска ситуација во националната федерација, а сите останати клубови освен машкиот и женскиот тим на Кур, ставија „катанец на врата“.

Што се однесува до играчкиот кадар, Кур во минатото сметаше на многу руски ракометарки и некои од поранешните СССР простори, а сега има на располагање 17 ракометаки меѓу кои се пет интернационалки – три Црногорки, една Хрватка и една Русинка.

Познато име за македонската јавност е левиот бек Есма Муратовиќ, која во сезоната 2023/2024 играше за нашиот шампион Ѓорче Петров. Тука се уште младата руска голманка Анастасија Хлебалова (19), искусната Ана Марија Гугиќ од Хрватска (екс Подравка, Ериче), која има 35 години и игра на десната бековска позиција, како и средниот бек Ана Радовиќ и пивотот Дајана Миљаниќ.

На двете средби со кипарскиот Апоел од второто коло во ЕХФ Европскиот Куп, најмногу голови – 19, даде Есма Муратовиќ, 12 пати стрелаше Ана Радовиќ, додека капитенот Сабина Смагина, која игра на десната крилна позиција реализираше 11 пати, па стручниот штаб на Чаир веќе знае на кои ракометарки треба да обрне најмногу внимание во одбраната. Искусниот среден бек Марта Абасова, исто така е едно имињата на кои треба да се обрне внимание, заедно со пивотот Миљаниќ и десниот бек Гугиќ.

Севкупно земено, Кур има солидна прва постава, но Чаир има подобар состав на хартија и ќе биде фаворит за пласман во осминафиналето на ЕХФ Европскиот Куп, со што клубот би го повторил најголемиот успех во Европа. Сепак не треба во никој случај да биде потценет ривалот, иако доаѓа од неракометна земја, во која сезонава не се игра првенство.

Ракометарките на Стружанка остварија победа на гостувањето кај Шампион со 21-19, иако во средината на вториот дел беа во негатива.

Стружанка водеше со 11-10 на паузата, но во второто полувреме домаќинките имаа во два наврати водство од два гола разлика.

Преку Трпкова, Шампион водеше со 16-15, но осум минути потоа не постигна гол, а гостинките тоа го казнија со четири гола во серија за 19-16.

На пет минути до крајот Шампион намали одново преку Трпкова на гол негатива, но Стружанка даде два гола во серија за триумф преку Маркоска и Трпеновска.

Најдобри стрелци во победничкиот тим беа Марија Маркоска и Бојана Билкова, додека Ева Трпкова даде шест за Шампион.

Во следното коло, Стружанка ќе игра градски двобој против Струга, додека Шампион ќе гостува кај Астибо.