Малик Татар летово прави голем чекор во кариерата, откако по одличната сезона во словенечката лига ќе го облече дресот на Еурофарм Пелистер. Младиот словенечки бек зад себе остави сезона за паметење во Шкофљица, а сега го чека нов предизвик во Битола, каде ќе работи под водство на Лино Червар.
Татар беше едно од најпријатните изненадувања во словенечкиот шампионат. Во сите натпреварувања постигна 232 гола, од кои 218 во лигата, и сезоната ја заврши како најдобар стрелец. И самиот признава дека не очекувал сè да се развие толку брзо, иако верувал во себе и во тоа дека може да покаже повеќе отколку што му било дозволено претходно.
Тој открива дека уште пред почетокот на сезоната си поставил мал, но јасен предизвик – барем едно коло да биде прв стрелец на лигата. Наместо тоа, на врвот останал до крајот. Татар вели дека во Шкофљица добил вистинска шанса, но и средина во која можел да се развива и како играч и како човек.
Трансферот во Битола, според неговите зборови за словенечка „Екипа“, се случил многу брзо.
„Се почна и заврши за една недела“, вели Татар, објаснувајќи дека сè се забрзало по повикот од неговиот агент.
Му било пренесено дека Лино Червар и луѓето од Еурофарм Пелистер сакаат да го доведат, а кога договорот стигнал, веќе немало многу простор за размислување.
Еден од најинтересните моменти од целата приказна е разговорот со Червар. Татар открива дека морал да му каже нешто што одамна го носел во себе.
„Како дете ја гледав Хрватска кога тој беше селектор. Сега Червар ќе ми биде тренер. Интересно е какви патишта ти прави спортот.“
Сега, години подоцна, токму човекот кого го гледал на телевизија како селектор ќе му биде тренер во клубот. За него, тоа е уште една потврда колку неочекувани патишта знае да отвори спортот.
Младиот бек не крие дека има големи амбиции и дека со нетрпение го чека новото поглавје. Еурофарм Пелистер за него е шанса за исчекор, за европски натпревари и за уште поголем развој. Желбата му е да продолжи во ист ритам и во Битола, со што повеќе вакви сезони зад себе.
Во интервјуто за „Екипа“, Татар зборуваше и за репрезентацијата. Објасни дека во еден период сам се повлекол од младинската селекција, затоа што не сакал да биде „црна овца“ во тимот, но јасно порача дека од репрезентативните амбиции не се откажува. Напротив, неговата цел е еден ден да заигра за сениорската репрезентација на Словенија на големо натпреварување.
_________________________________________________________________________________________
▶▶▶ Добивај директно РАКОМЕТНИ ВЕСТИ вести на твојот мобилен телефон, приклучи се на Viber групата на семејството на 24ракомет. Со еден клик до сите вести.
_____________________________________________________________________________________________________
