Левото крило Полина Кузнецова и десното крило Олга Фомина (Черноиваненко) ја одиграа последната сезона во своите кариери.
Kузнецова, која има 38 години, ја заврши кариерата во Ростов Дон, додека Фомина реши да се прости од ракометот на 36 години како ракометарка на Лада Тољати.
Покрај тоа што беа руски репрезентативки и освоија низа одличја на големите натпреварувања, заедничко за двете е тоа што низ кариерата играа само за еден странски клуб – Вардар.
Кузнецова ја градеше кариерата низ настапите за Динамо Волгоград, Астраханочка, Звезда Звенигород, Кубан Краснодар, Лада Тољати, а по враќањето од Вардар во 2018 година досега играше за Ростов Дон.
Фомина започна во Лада Тољати, од 2014 до 2016 година беше дел од „црвено-црното“ семејство, па одигра една во Ростов Дон и од 2017 досега играше за матичниот клуб од Тољати.
Кузнецова за руската репрезентација настапи на 157 меча и даде 419 погодоци, додека Фомина играше на 135 натпревари и постигна 276 голови.
