Екипата на Вардар им го нанесе првиот сезонски пораз на „сино-белите“ од Автокоманда, откако во дерби дуелот од 12. коло од Супер лигата славеше на свој терен со 29:27. Сега двете екипи имаат по 22 бода на табелата, но тимот од Автокоманда останува на првата позиција, бидејќи првиот меѓусебен дуел заврши со победа на тимот на Кире Лазаров од 33:30.

Домаќините имаа одличен старт, поведоа со 3:0 преку Горига и Борозан, а гостите од Автокоманда првиот гол го постигнаа по пет минути игра. Следуваше период, во кој Вардар имаше резултатска контрола, но како одминуваше времето, така тимот од Автокоманда се враќаше во игра.

По предноста на Вардар од 5:3, гостинот со два гол во низа израмни на 5:5. Се играше гол за гол, во еден момент двете екипи наизменично се менуваа во водство, а по нерешените 9:9, гостинскиот тим за две-три минути постигна два гола и се одлепи на 11:9.

Вардар возврати со иста мера, израмни на 11:11 во 20 минута. Домаќинот во периодот од 21 до 25 минута имаше неколку шанси да дојде до плус два, но никако не успеаваше да реализира. Откако беше 13:13, тимот на Вардар најпрво поведе со 14:13, а потоа со голот на Јагуриновски дојде до 15:13, резултат кој што гласеше на полувреме.

Избраниците на Милано за неколку минути игра во второто полувреме дојдоа до18:15, но ракометарите на Лазаров не дозовлија „црвено-црните“ да имаат комоција во играта и бргу израмнија на 18:18. Двете екипи постигнаа уште по четири гола, пред Вардар да го направи вистинскиот чекор.

Беше 22:22, домаќините предводени од голманот Еспиња се одлепија на 25:22 и до крајот успеаја да ја сочуваат стекнатата предност. Вардар во последните пет минути влезе со предност од 27:24, гостите се заканија намалувајќи на 26:25, а Вардар со головите на Николиќ и Горига ја потврди посакуваната победа.

Најефикасни кај Вардар беа Дмитриј Горига со седум и Марко Срдановиќ со шест гола. Во поразениот табор се истакна Марко Митев со пет реалзиации.

Дерби дуелот во црногорскиот шампионат меѓу Беране и Ловќен беше проследен со голем скандал, откако навивачите на домашниот тим направија нереди на трибините.

Како што пишуваат медиумите од Црна Гора, навивачите на Беране, извикувале погрдни зборови за гостите од Цетиње нарекувајќи ги усташи, скандирале „Косово е Србија“ и на крајот ги гаѓале со стаклени шишиња.

Натпреварот во дури три наврати бил во прекин поради запалени факли, а во еден момент играчите на двата тима влегле во конфликт, но најприсебните од двата табори спречиле голем хаос.

,,Навивачите на домашната екипа за време на натпреварот фрлаа пластични шишиња кон ракометарите од Цетиње, ги нарекуваа усташи, па дури и скокаа на теренот за да се пресметаат со гостите”, пишува црногорскиот портал „Вијести“.

Ракометарите на Ловќен го добија дербито против Беране, славеа со 26:22 и се израмнија на табелата со Рудар и Будуќност Подгорица, сите три екипи имаат по 12 бода, додека Беране има осум.

По независноста на Црна Гора, овие два тима беа најголеми ривали во црногорскиот шампионат.

Ovako su se igrači Lovćena proveli u #Berane

“U finišu utakmice Beranci su rukometaše cetinjskog tima gađali predmetima među kojima su bile i staklene flaše, a pojedinci su pokušali i da uđu na teren i fizički se obračunaju sa igračima crnogorskog šampiona”.

“Utakmica je tri… pic.twitter.com/th8GHTqIc9

— CGsport.me (@cgsportme) November 25, 2024

Европската ракометна федерација ги објави официјалните лица за натпреварите во последното коло од групната фаза во Лигата на Европа.

Даниело Божиновски и Виктор Начевски ќе патуваат во Франција и ќе судат натпревар што се очекува да донесе многу возбудувања.

Тоа е мечот меѓу Монпелје и шпанскиот Гранољерс, по кој ќе биде познато колку бодови ќе пренесат двете екипи во главната рунда.

Овој дуел се игра на 26 ноември со почеток во 20:45 часот, а Монпелје сигурно е прв на табелата, Гранољерс втор, но двете екипи ќе се борат за да пренесат што повеќе бодови во главната рунда.

Тимот на Ваљадолид каде што играат македонските интернационалци Димитар Димитриоски и Мартин Карапалевски, по три меча запиша победа во Асобал лигата.

По реми дуелите со Куенка и Ла Риоха, како и поразот од Пуенте Хенил, Ваљадолид на домашен терен славеше против Виља де Аранда со 37-26.

Триумфот беше најавен уште по првиот дел, кога избраниците на Давид Писонеро водеа со 17-13, а во второто полувреме комплетно го надиграа ривалот.

Димитриоски беше меѓу најдобрите стрелци и успеа да постигне четири погодоци од пет обиди, додека Карапалевски реализираше еднаш.

Ваљадолид сега има 11 бода и се наоѓа на делба на петтото место, а следен предизвик ќе биде гостувањето кај големата Барселона.

Тимот на Цирих, каде што настапува македонскиот интернационалец Мартин Поповски, беше елиминиран од Купот на Швајцарија.

Иако беше во игра до самиот крај, на моменти низ средбата и водеше, сепак Цирих на крајот мораше да се помири со пораз во драмата со Криенс Луцерн, 29-28.

Поповски беше најдобар стрелец на теренот и успеа да постигне седум погодоци од девет обиди во противничката мрежа.

По европската елиминација, сега и од Купот на Швајцарија, сега за Цирих и Поповски останува уште швајцарскиот шампионат.