Ѓорче Петров ја одбрани шампионската титула во Женската лига, откако славеше над Шампион со 64-12 и сега има 70 бодови, односно недостижни девет бодови пред второпласираниот Чаир.
Ова за Ѓорче Петров е трета шампионска титула во серија по оние во 2022 и 2023 година, а вкупно 20 во клупската историја, откако овој клуб ги наследи титулите на легендарниот Кометал ЃП.
За натпреварот со Шампион доволна е една реченица. По првото полувреме беше 30-4, шанса за настап добија сите ракометарки, а вториот дел беше само како тренинг натпревар и „лавиците“ постигнаа уште 34 погодоци.
Најдобри стрелци во редовите на шампионот беа Емилијана Ризоска со 13 погодоци и Ева Божиновска која додаде уште девет. Во составот на Шампион по три гола дадоа Мила Филипова и Ана Ристевска.
Избраничките на Симе Симовски имаат за играње уште два меча, дома со Астибо и на гости кај Вардар, на кој ќе ја добијат шампионската титула. Следниот викенд ги очекува настапот и на Ф4 во Купот на Македонија.
ПОВРЗАНИ ВЕСТИ
