Денеска во седиштето на Европската ракометна федерација во Виена беше извршена ждрепката за младинското Европско првенство.
Македонските младинци со претходна ждрепка добија место во четвртиот шешир, а потоа беа извлечени во групата А.
Избраниците на Раде Стојановиќ ќе се соочат со селекциите на Црна Гора, Австрија и Хрватска. Првите два ривали ги победивме на минатото СП во Хрватска.
По одигрувањето на трите меча од групната фаза, 24 селекции се делат во три дела – главна рунда со осум репрезентации, разигрување за пласман на СП со осум репрезентации и разигрување за пласман и опстанок на ЕП со осум репрезентации.
Она што е сигурно е дека ќе се одиграат 96 натпревари на ЕП, а секоја репрезентација загарантирано ќе одигра по осум натпревари (три во групна фаза, три во главна рунда/разигрување за место на СП/разигрување за опстанок и плус два меча за пласман).
Само првопласираните шест селекции по групната фаза имаат загарантирано место во главната рунда, а дополнително уште две второпласирани ќе играат во главна рунда. ЕХФ треба да го потврди и начинот на кои ќе бидат одредени тие селекции и како ќе се формираат групите за разигрување за место на СП и оние за опстанок на ЕП.
Европското првенство за младинци ќе се игра во Целје, Словенија, од 10 до 21 јули претстојното лето.
ЕП младинци, Словенија:
група А: Македонија, Австрија, Хрватска, Црна Гора
група Б: Грција, Србија, Германија, Португалија
група Ц: Швајцарија, Франција, Шпанија, Фарски Острови
група Д: Романија, Чешка, Унгарија, Норвешка
група Е: Израел, Италија, Данска, Словенија
група Ф: Украина, Полска, Шведска, Исланд
ЕХФ шампионат, Косово:
група А: Бугарија, Финска, Косово
група Б: Белгија, Луксембург, Турција
група Ц: Естонија, Литванија, Грузија
група Д: Велика Британија, Летонија, Словачка
ПОВРЗАНИ ВЕСТИ
