16 исклучувања и 2 црвени картони – Јехона едвај го победи Борец!

Ракометарите на Јехона имаа победнички старт во новата сезона во Првата лига, откако на првиот турнир во Кичево, потешко од очекувањата го совладаа тимот на Борец од Велес со 33-35.

Гостиварци иаа убедлив старт и се одлепија на 6-10, но велешките ракометари беа упорни и стигнаа до реми на полувреме, 13-13.

Во второто полувреме Јехона ја имаше предноста и водеше со еден до три голови разлика, но Борец секогаш беше тука некаде и се враќа во игра. На десетина минути до крајот, избраниците на Фари Селмани стигнаа до плус четири, 27-31, но не можеа да бидат мирни во финишот.

Велешани преку Гочев и Димески намалија на 30-31, а тогаш поради трето исклучување Јехона остана без Бошковски. Сепак неговиот тим успеа да поведе со 31-34, но Борец пак се врати на минус еден 33-34.

Во драматичната завршница, Гочев направи фаул, доби црвен картон, а Јехона доби удар од седум метри. Успешен реализатор беше Тасески за 33-35 и голема радост на гостиварци.

Најдобри стрелци во победничкиот тим беа Салиу со 12 голови и Тасески со осум, додека кај Борец се истакнаа искусниот Мачавелов со седум, како и Сиљанов и Атанасовски со шест погодоци.