Ракометарите на ПИК Сегед досега забележаа три порази во Лигата на шампионите во три одиграни натпревари. Загубија на гости кај Келце, Порто и Мешков Брест, а им беа одложени домашните натпревари со Вардар, ПСЖ и последно со Фленсбург.
На редовното тестирање пред дуел од елитното натпреварување, беше откриено дека повторно има позитивни ракометари во унгарскиот вицепрвак, вкупно тројца, и сега екипата повторно е во карантин – третпат сезонава.
Мешков Брест, пак, објави во понеделник дека има неколку позитивни ракометари и цел тим ќе оди во карантин. Неофицијално, бројката на заразени играчи изнесува девет, а дел од нив веќе биле позитивни на претходното тестирање минатата недела пред дуелот со ПИК Сегед.
Но белорускиот првак веројатно во желба да го искористи фактот што ПИК Сегед ослабен гостува во Брест и да слави лесна победа, не го пријавил позитивниот ракометар (Александар Шкуринскиј) ниту кај гостите, ниту во ЕХФ. Уште еден играч, голманот Иван Мацкевич, не беше во ростерот поради симптоми на Ковид-19. Шкуринскиј и Мацкевич цело време претходно биле на тренинзите и имале контакт со останатите ракометари на Мешков Брест.
Сега Унгарците фрлаат со „дрва и камења“ по Мешков Брест и по ЕХФ, која дозволи да се одигра овој натпревар.
„Имаме докази дека во понеделникот веќе имало играч на Мешков Брест чиј тест бил позитивен. Сепак, поради некоја причина, тие не го пријавија тоа до ЕХФ. Во средата му се обративме на ЕХФ со писмо кога станавме свесни за оваа работа и кога во средата попладне Брест официјално го објави позитивниот тест. Не знам што се случуваше два дена, не сакав да размислувам за тоа, но секако ми падна на памет дека сакаат да играат. ЕХФ беше непоколеблива, ги одби нашите барања и беше децидна дека мора да се игра“, изјави претседателот на ПИК Сегед, Петер Шуч за унгарскиот „Телекс“.
Откако информацијата веќе се раширила, на денот на натпреварот ЕХФ наложила цел тим на Мешков Брест да биде тестиран, а резултатите што ги добиле на два часа пред мечот не им биле покажани на гостите, туку само им било кажано од страна на ЕХФ дека сите се негативни и дека натпреварот мора да се игра.
Унгарците тврдат дека ракометарите и стручниот штаб на Мешков Брест им признале дека во тимот имале позитивни тестови, ПИК Сегед не сакал да излезе на теренот, но на крајот мораше да го игра натпреварот.
„Ние ги тестираме сите наши играчи уште од почетокот на сезоната, надвор од задолжителниот тест. Сепак, сакаме да ја разјасниме одговорноста што е можно поскоро. Ако знаеме дека еден од нашите позитивни противнички играчи беше во понеделникот, зошто беше објавен пред натпреварот. И играчите на Брест и нивниот тренер во понеделникот знаеја дека еден од нивните соиграчи е позитивен, и тоа им го кажаа на нашите играчи и тренери. ЕХФ го игнорираше ова и сакаше натпревар. Тажно е што се случи затоа што го загрозивме здравјето на нашите играчи. Не можеме да им го сториме ова. Дали ќе чекаме некој да отиде на респиратор? Ракометот е контактен спорт, поголем е ризикот од инфекција. Разбирам дека шоуто треба да продолжи, разбирам дека е важно да им служиме на ТВ-компаниите засновани на права, но за нас е многу поважно да се грижиме за нашите играчи, нивните семејства, отколку да им служиме на нашите спонзори“, продолжува Шуч.
Мешков Брест победи со 26-24, а претседателот на унгарскиот тим најавува дека клубот ќе ги преземе сите мерки за овој случај да не помине неказнето.
ПОВРЗАНИ ВЕСТИ
