Пролет го реши тренерското прашање – доаѓа Андон Бошковски

Поранешниот стратег на Вардар и на Еурофарм Работник, Андон Бошковски, е изборот на управата на Пролет за шеф на стручниот штаб за наредната натпреварувачка сезона.

Постигнат е целосен договор за двегодишна соработка со овој ракометен стручњак, кој ќе го предводи тимот во европската авантура, но истовреме и ќе се обиде да ги повтори резултатите од минатата сезона, што Пролет ја заврши на извонредната трета позиција на македонската ракометна сцена.

Бошковски минатата сезона ја почна како предводник на проектот КЛ7, клуб со кој бележеше добри резултати и овозможи развој на младите ракометари на оваа екипа. На почетокот од годинава тој си замина од скопскиот суперлигаш, нешто подоцна го прифати предизвикот во Радовиш и со серија извонредни резултати му овозможи на овој клуб да опстане во елитното друштво.

Андон Бошковски во кариерата пред овие два клуба ги има водено и Струга, Еурофарм Работник, Работнички, Вардар и Младост Богданци, тој беше помошен тренер во Металург и во македонската ракометна репрезентација, додека од меѓународните предизвици во тренерската кариера беше селектор на Грузија, а извесно време мина и во романскиот клуб Роман.