Пролет ги казни грешките на Тиквеш, со нов триумф остана зад најдобрите

Ракометарите на Пролет дојдоа до победа од 31:26 против Тиквеш, во натпревар со два директни црвени картони уште на средина од првото полувреме. Домашните беа подобри во клучните моменти и знаеја како да ги казнат грешките на противникот така што на крајот ги зачуваа бодовите.

Од почетокот на натпреварот екипата на Пролет наметна свое темпо. Гостите од Кавадарци 12 минути не можеа да дојдат до погодок. За ова време домашните веќе водеа со 4:0 и овој резултат најави убаво продолжение на средбата за домашниот тим.

Првиот гол за гостите го постигна Кондев во 12. минута, но предноста постојано беше во корист на Пролет. На моменти нервозата доаѓаше до израз односно избиваше на површина, па на почетокот на 16. минута дојде и до размена на по некој удар. Во борба за топка Палевски и Стефановиќ беа жестоки, па тоа ги внесе во мешаница и сите ракометари.

Најдебелиот крај го извлекоа оние кои ја почнаа мешаницата. И двајцата завршија на трибините, па средбата продолжи без проблеми после прекинот кој траеше 3-4 минути.

Сепак, овој прекин како да им одговараше повеќе на гостите кои фатија приклучок и успеаја до крајот на првиот дел да издржат на ниска негатива и на одмор да биде 13:12.

Вториот дел продолжи во ист ритам. Пролет го имаше водството и контролата на резултатот, но немаше сигурност дека ќе може лесно да дојде до триумф. Мораше да се одработи добро на овој дуел за да се дојде до потребниот резултат. разликата се движеше од еден до три гола.

Имаше жестоки дуели, но во граница на нормалното така што беше јасно дека нијанси ќе одлучуваат на крајот. Сепак, на пет минути до крајот, домашните како да го засилија темпото. Најдоа начин да одиграат добро во одбрана и да казнат во напад, па се изборија за 28:24.

До крајот предноста беше задржана, а тимот на Тиквеш мораше да се помири со нов пораз. Ракометарите на Пролет знаеја како да го зачуваат водството и да дојдат до триумф со кој остануваат во горниот дел од табелата.

СУПЕР МАШКА ЛИГА – ТАБЕЛА