Ракометарите на Работнички го кренаа нивото на формата и почнаа да играат сè подобро, па после Бутел Скопје на својтерен го совладаа и составот на Еурофарм Пелистер 2. Денеска беа подобри од битолчани со 28:23.
Предводни од Тоше Ончев на теренот, на ракометарите на Работнички не им беше тешко особено во вториот дел да имаат контрола на резултатот. Ончев беше стрелец на дури 11 погодоци со кои беше далеку пред колегите.
Средбата имаше израмнето прво полувреме во кое долго имаше надигрување. Сепак, пред заминувањето на одмор, Работнички успеа да создаде предност од два гола и на паузата да има 14:12.
На стартот од вториот дел гостите успеаја да се доближат и да намалат на гол негатива, но не и да направат нешто повеќе. Сепак, Работнички успеа одново да зададе удар кој овој пат резултираше со поголема предност. При 22:17 веќе беше решен победникот на овој дуел така што докрајот само остана да се заврши задачата и да се зачува предноста од пет гола.
Работнички – Еурофарм пелистер 2
Работнички успеа во тоа и го доби овој дуел со 28:23 за нови три бода со што практично останува во трка за местата кои водат во плеј-оф иако тоа ќе биде тешка мисија до крајот од регуларниот дел од сезоната.