Ракометарите на Јуниор Кисела Вода ја остварија првата победа во клупската историја во Суперлигата. По двата порази од Пролет дома и на гости кај Струга, избраниците на Благојче Весиќ го победија Астраион со убедливи 30-23. Струмичани беа ослабени со неиграњето на тројца позитивни ракометари на Ковид-19.
Во првиот дел струмичани одржуваа резултатска рамнотежа дваесетина минути, додека играше Мите Караиванов. Тој се повреди и не можеше да го продолжи мечот.
Астраион израмни на 9-9 и оттогаш до крајот на полувремето не постигнаа гол. Нивните грешки беа казнети од домашниот тим кој преку Бајрактаревиќ и Манев, кои погодија по два пати на пауза заминаа со плус четири, 13-9.
Јуниор КВ поведе и со 16-9 на стартот на вториот дел, а струмичани погодија по првпат во вториот дел дури во 38. минута, 16-10. Тренерот на доамшните, Весиќ, им даде шанса на ракометарите од клупата, но тоа не се почувствува во резултатот и мечот заврши со убедлива победа за Јуниор КВ, 30-23.
Најдобри стрелци кај победникот беа Бајрактаревиќ со осум и Ролевски со четири погодоци, додека кај струмичани се истакна Наков со 11 голови, а по четири постигнаа Караиванов и Јанковски.