Германскиот шампион, Кил ги доби противниците за новата сезона во рамките од Лигата на шампионите.
Кил во првата фаза за противници ги има екипите на ПИК Сегед, Алборг, Мешков Брест, Монпелје, Загреб, Елверум и македонскиот шампион, Вардар.
Управниот директор на Кил, Виктор Шилаги беше задоволен од ждрепката и истакна дека со нетрпение ги очекуваат натреварите против Алборг и ПИК Сегед.
„Имаме неколку интересни ривали. Особено се радуваме на Алборг и на унгарскиот шампион Сегед, со кои веќе водевме возбудливи дуели минатата сезона. Патувањето во Норвешка ќе биде исто така интересно. Никогаш немаме играно против Елверум, а нашите двајца Норвежани Сандер Сагосен и Харалд Рајнкинд ќе можат да го носат дресот на Кил во нивната матична земја за првпат. Но, и другите противници имаат свој шарм. Нашата цел е непроменета – во групната фаза сакаме да ги поставиме темелите за пласман на „фајнл-фор“ на Лигата на шампионите”, изјави Шилаги.
Екипата на Кил натпреварите во Лигата на шампионите ќе ги стартува на 15 или 16 септември, а прв противник ќе биде шампионот на Белорусија, Мешков Брест.
ПОВРЗАНИ ВЕСТИ
