Поранешниот лев бек на Тиквеш, Душан Медиќ, има нов клуб во Србија. Тој потпиша за тимот на Гоч Меркур и ќе се обиде да му помогне да се пласира во елитата. Претходно беше дел од турската Сакарија и францускиот Поитие по заминувањето од Кавадарци.
Данскиот Икаст објави дека е постигнат договор со шведското лево крило Оливија Мелегорд. 27-годишната Мелегорд во моментов е член на тимот на Савехоф, а со Икаст потпиша договор на две сезони.
Шпанската репрезентативка Лиза Чапчет на крајот од сезоната ќе си замине од европскиот шампион Вајперс Кристијансанд. Чапчет е блиску до договор со данскиот Оденсе каде работи екс тренерот на Кристијансанд, Оле Гукстав Гјекстад.
Бундеслигашот Мелсунген кој е предводен од Роберто Гарсија Парондо ги продолжи соработките со Арнар Арнарсон и Димитри Игнатов. Договорот со исландскиот пикер ќе има важност до 2025 година, додека со германското десно крило до 2026 година.
Тимот на Хамбург објави дека го задржува рускиот лев бек Азат Валиулин до 2025 година. Тој веќе четири сезони ги брани боите на некогашниот европски првак по преминот од Лудвигсхафен и за 86 меча даде 183 погодоци.
