Шпанската спортска јавност сè погласно шпекулира за можноста еден од најмоќните спортски клубови во светот, Реал Мадрид, повторно да формира ракометна секција.
Идејата доаѓа од Енрике Рикелме, потенцијален кандидат за претседател на клубот, кој ја спомена можноста за враќање на ракометот како дел од својата визија за иднината на „кралскиот клуб“.
Иако денес Реал Мадрид е препознатлив по своите успеси во фудбалот и кошарката, малкумина знаат дека клубот имал и ракометна екипа. Од 1952 до 1959 година мадридскиот гигант се натпреварувал во шпанското првенство, освојувајќи и една национална титула пред проектот да биде згаснат.
Повеќе од шест децении ракометот не е дел од спортското семејство на Реал Мадрид, но евентуалното враќање би можело значително да ја промени сликата на шпанскиот и европскиот ракомет. Во моментов, шпанската сцена е речиси целосно доминирана од Барселона, која со години нема вистинска конкуренција на домашната сцена.
Засега станува збор само за шпекулации. Не е претставен официјален проект, ниту пак актуелното раководство на Реал Мадрид се огласило по повод овие информации. Сепак, самата можност клуб со ваков финансиски и спортски потенцијал повторно да влезе во ракометот веќе предизвикува големо внимание низ Европа.
