Репрезентацијата на Црна Гора славеше против Словенија со 29:28 во пријателски натпревар како дел од подготовките за настап на ЕП 2024.

Словенија, која е предводена од екс селекторот на Црна Гора, Драган Аџиќ, на полувреме имаше предност од 15:11, а во 43 минута плус седум, 23:16.

Избраничките на Сузана Лазовиќ во последниот период успеаја да направат целосен пресврт, постигнаа дури 13 гола, додека составот на Аџиќ само пет гола.

Најефикасна кај Црна Гора беше Милена Раичевиќ со седум гола, а ја следеше Ивона Павичевиќ со гол помалку – шест.

Двете репрезентации во текот на утрешниот ден ќе одработат заеднички тренинг.

Во рамки од првото коло од Златната лига, Холандија убедливо славеше над Романија со 41:26 (22:14), додека Норвешка, која на ЕП ќе ја брани титулата, одигра реми со Данска, 27:27 (12:15).

Македонскиот шампион Еурофарм Пелистер во рамки од 8. коло во Лигата на шампионите одигра реми против Фредериција, 29:29.

Еден од погодоците на пелистерци против данскиот вицепрвак се најде во изборот на медиа тимот на ЕХФ за ТОП 5 на 8. коло.

Атрактивниот цепелин во режија на Дејан Манасков и Богдан Радивојевиќ беше рангиран на третото место.

Пелистерци во следното, 9. коло од европската елита ќе гостува кај унгарскиот гигант Веспрем.

TOP 5 GOALS: Skill, power, and flair! 💥

1️⃣ MORYTO’s magic ✨
2️⃣ ROSTA’s strike 🎯
3️⃣ RADIVOJEVIC’s fly ✈️
4️⃣ REICHMANN’s spin 🌪️
5️⃣ N’GUESSAN’s power 🚀

Best one for you? #ehfcl #CLM #handball pic.twitter.com/hPAdvuiwWn

— EHF Champions League (@ehfcl) November 22, 2024

Екипата на Бутел Скопје им се врати на победите во суперлигашкото друштво, откако на гостувањето во Куманово кај истоимената екипа славеше со 29:22.

Избраниците на Горан Кузманоски отворија според посакуваното, поведоа со 4:0 во воведните пет минути, а домашниот тим првиот гол го постигна дури во 10 минута преку кружниот напаѓач Дарио Симоноски.

Гостинот од Скопје немаше многу проблеми, лесно стигнуваше до реализација, на полувреме замина со резултатска предност од плус осум, 13:5, додека вторите 30 минути, кои беа повеќе формалност, ги одработи рутински.

Во победничкиот тим расположен меѓу стативите беше искусниот Александар Стојаноски, кој не дозволуваше лесно да биде совладан. Кај Бутел најефикасен беше Дамјан Субашевски со осум гола.

Кај домаќините најрасположен за игра беше Давид Димевски, постигна седум гола во мрежата на гостите, а по четири имаа Иван Димитров и Дарио Симоноски.

Бутел Скопје во следното, 13. коло од најквалитетното домашно натпреварување ќе го пречека Охрид.

Женската сениорска репрезентација на Македонија беше поразена од Хрватска со 26:18 во рамки од турнирот „Кроација Куп“ кој се одржува во хрватскиот град Новиград.

Покрај лошата реализација, денеска свој ден немаа ниту голманките, Мицевска (0/11), Петковска (0/9), а младата Чурлиновска во дадената минутажа успеа да одбрани три удари на противничките.

Избраничките на Ивица Обрван од самиот старт наметнаа свое темпо и константно беа во предност, во неколку наврати Македонија се закануваше, но немаше сили за камбек, па така Хрватска ги казнуваше речиси сите грешки на нашата репрезентација.

Домаќинките на полувреме заминаа со предност од 14:8 и рутински ги одработија вторите 30 минути, во кои немаше поголема промена на теренот.

Најефикасна во Македонија беше Ива Младеновска со три гола, останатите, кои се запишаа во листата на стрелци, имаа по два и еден гол.

Македонија утре, во истиот термин, 16:00 часот силите ќе ги одмери со Србија. Дуелот со северниот сосед ќе биде последниот тест пред настапот на Европското првенство во Дебрецин.

Ракометарките на Македонија во рамки од групната фаза за ривали ги имаат репрезентациите на Шведска, Унгарија и Турција на континенталниот собир, а најдобрите две ќе продолжат во главната фаза.