ИХФ воведува посебни правила на првото Светско првенство за ракометарки до 16 години, кое ќе се одржи во Мароко. На теренот нема да биде дозволена игра без голман, замените ќе бидат ограничени, а натпреварите ќе ги судат тројца арбитри.
Меѓународната ракометна федерација (ИХФ) од 16 до 24 октомври ќе го организира првото СП за ракометарки до 16 години во Агадир, Мароко. На историското издание ќе настапат 16 репрезентации, но покрај борбата за светската титула, вниманието ќе го привлечат и посебните правила со кои ИХФ сака да го поттикне развојот на младите ракометарки.
Најинтересната новина е забраната за игра „7 на 6“, односно користење дополнителен играч во нападот наместо голман. Ова правило веќе беше применето на првото СП за ракометари до 17 години во 2025 година, а сега ќе важи и во женска конкуренција.
ИХФ смета дека со ваквите ограничувања младите ракометарки ќе добијат подобри услови за развој на индивидуалните способности, како во нападот, така и во одбраната.
Една од најголемите промени се однесува на замените. Ракометарките ќе смеат да бидат заменети само кога нивната екипа ја има топката во посед. Тоа значи дека нема да бидат дозволени вообичаените специјализирани замени меѓу нападот и одбраната. Исклучок ќе бидат повредените ракометарки, а замени ќе бидат дозволени и за време на тајм-аут.
Доколку екипа направи замена кога ја нема топката, ракометарката што влегува во игра ќе добие исклучување од две минути.
Дополнително, голманот ќе мора постојано да биде на теренот. Нема да смее да биде заменет со дополнителен играч во поле, ниту да ја премине централната линија и да влезе на противничката половина. За прекршување на ова правило е предвидено исклучување од две минути, а во случај на фронтален судир според соодветното правило може да следува и црвен картон.
Натпреварите ќе се играат во стандардно времетраење од двапати по 30 минути, со десетминутна пауза на полувремето. Ќе се користи топка со големина 2, но без лепак или други средства за подобро држење. ИХФ веќе го применува овој концепт на дел од младинските натпреварувања.
Натпреварите ќе ги судат тројца арбитри. ИХФ претходно го тестираше овој систем на повеќе натпреварувања, меѓу кои и Светското првенство за ракометари до 17 години. Целта е подобра контрола на играта и полесно следење на ситуациите на теренот.
На првото Светско првенство ќе учествуваат 16 репрезентации, поделени во четири групи. За разлика од вообичаените системи, само првопласираните селекции ќе обезбедат место во полуфиналето.
Останатите репрезентации ќе играат натпревари за конечен пласман, а секоја селекција ќе одигра по пет средби. Групната фаза е закажана за 16, 18 и 20 октомври, полуфиналните натпревари ќе се играат на 22 октомври, а првиот светски шампион ќе биде познат на 24 октомври.
На првенството ќе настапат Германија, Унгарија, Швајцарија, Русија, Белорусија, Кина, Мароко, САД, Казахстан, Парагвај, Гвинеја, Узбекистан, Мексико, Тунис, Аргентина и Египет.
▶▶▶ Приклучи се на VIBER – https://abit.ly/viber-24rakomet
Добивај директно РАКОМЕТНИ ВЕСТИ на твојот мобилен телефон 📲.
Со еден клик до сите вести. 🤾
