Европската ракометна федерација ги објави официјалните лица што ќе бидат дел од Европското првенство за жени што ќе се игра во Полска, Чешка, Словачка, Турција и Романија од 3 до 20 декември.
Судиите Даниело Божиновски и Виктор Начевски за првпат добиваат делегирање на сениорско континентално натпреварување, откако досега ги покажаа своите квалитети на повеќе младински шампионати, европски и светски.
ЕХФ номинираше 16 двојки, иако беа најавени 18, а дополнително ќе бидат познати уште двата пара што ќе судат на ЕП. Покрај женската репрезентација на Македонија, нашата држава ќе биде претставена oд Божиновски и Начевски, кои освен ЕХФ значка имаат и ИХФ значка од 2022 година.
Пред почетокот на шампионатот, сите номинирани судии ќе учествуваат на подготвителен семинар во Виена, кој ќе се одржи од 11 до 13 септември.
____________________________________________________________________________________________________
Добивај директно вести на твојот мобилен телефон, приклучи се на Viber групата на семејството на 24ракомет. Со еден клик до сите ракометни вести.
_____________________________________________________________________________________________________
За Божиновски и Начевски ова е уште едно големо признание од ЕХФ и потврда за нивниот висок рејтинг на меѓународната сцена. Македонската судиска двојка веќе неколку години редовно суди на европски и светски натпреварувања во младинските категории, стандардно се дел од европските купови на клупско ниво, а минатата сезона за првпат беа дел и од Лигата на шампионите.
Нивната номинација претставува уште една потврда дека Македонија и понатаму има свои претставници во самиот врв на европското судење.
