Со блескава игра во финалето, машката репрезентација на Германија и женската селекција на Шпанија се искачија на тронот на Европа и ги освоија златните медали на кадетското ЕП во ракомет на плажа, кое се одржа во Аланија, Турција.
Младите таленти пружија врвна забава и емоции пред преполни трибини, оставајќи ги гледачите воодушевени од спектакуларни поени и атрактивни одбрани.
Шпанија сонуваше злато и во машка и во женска конкуренција, но Германија им ги уништи надежите со сигурна победа од 2:0 (18:16, 19:15) во финалето. Најзаслужен за германскиот триумф беше фантастичниот голман Бјарне Ролман, кој беше прогласен за најкорисен играч МВП и најдобар голман на турнирот.
Во натпревар полн драма, Чешка ја победи Унгарија со 2:1 (20:23, 19:18, 7:2), откако прво изгубија еден сет, потоа израмнија со златен гол и на крај доминираа во шут-аутот. Најдобар стрелец во машката конкуренција беше Матош Кек со неверојатни 159 поени, додека признанието за фер-плеј замина кај Хрватска.
За разлика од мажите, шпанските ракометарки изгледаа непобедливо во финалето против Норвешка. Со доминантна игра и резултат 2:0 (28:20, 17:14), Шпанија ја потврди својата доминација на женската сцена. Карлота Браво Гарсија, која постигна 20 поени во финалето, беше прогласена за најдобар играч на шампионатот.
Француските ракометарки стигнаа до бронзата по победа од 2:0 (19:18, 22:12) против Германија. Најдобар стрелец во женска конкуренција беше Јелена Мирковиќ од Србија со 141 поен, најдобар голман Милена Грим од Германија, а најдобар дефанзивец Петра Гудељ од Хрватска. Како и кај мажите, фер-плеј признанието повторно отиде во Хрватска.
