Унгарскиот шампион Веспрем и покрај тоа што веќе го имаше обезбедено првото место на табелата и место во четвртфиналето, не запира со победите во Лигата на шампионите.
Избраниците на Чави Пасквал триумфираа на гостински терен кај францускиот ПСЖ со 37-33, откако ја имаа контролата на теренот во текот на сите 60 минути.
Домаќините водеа само на стартот со 1-0, а потоа се беше во знакот на унгарскиот шампион. Голманот Коралес запиша 12 интервенции против поранешниот клуб, Маргуч имаше шест реализации, а по пет пати погодија Косоротов и Ремили.
Веспрем најчесто имаше предност од три до пет гола, а последните десетина минути ПСЖ преку Шипжак на два пати се закани и намали на минус еден.
Сепак немаше сили за комплетен камбек и сега во последното коло ќе мора да победи во Битола и да се надева на триумф на Висла против Спортинг, но и на триумф на Веспрем над Фуксе за да го освои второто место и директното место во четвртфиналето.
