Актуелниот македонски првак Еурофарм Пелистер најдоцна до среда треба да го промовира новиот тренер. Според информациите на 24Ракомет, тоа сигурно нема да биде Словенецот Бранко Тамше. Тој беше споменуван како најсериозен кандидат, и сите го гледаа на клупата на битолчани.

Тамше се уште е на апанажа во Нексе, и побарал превисока плата за доаѓање во Битола, дури и повеќе од она што го добивал кога беше тренер на хрватскиот клуб. Тој исто така е во преговори со германски клуб, па сакал преку Битола да си ја зголеми и цената во Бундеслигата. Затоа управата на Еурофарм Пелистер не постигна договор со него.

Новиот тренер што ќе има задача да ја задржи титулата во Битола нема да биде од Балканот. Новото име најверојатно ќе дојде од Шпанија или од Германија. Управата на Еурофарм Пелистер е во завршна фаза на договор со новиот тренер, и остануваат детали за договарање.

Во моментов на клупата на битолчани е Звонко Шундовски, но тој е само преодно решение, како замена за Бранислав Ангеловски. Екипата после 10 кола има два порази, но сега треба да почне вториот дел од сезоната, и дерби средбите против екипата од Автокоманда и против Вардар треба да ги игра пред домашна публика.

Долго е првенството, и има уште доста дерби средби кои ќе треба да се одиграат пред да се реши кој ќе биде шампион и победник на Купот.

Екипата на Раховец, кој е предводена од македонскиот стратег Горан Андоновски, а во која настапува кружниот напаѓач Стефан Атанасовски, ја продолжи победничката серија во домашниот шампионат.

Раховец во заостанатиот натпревар од 6. коло од најквалитетното натпреварување на Косово славеше убедливо против Вјоса на Илиja Трпевски и Обрен Фичуроски со 17 гола разлика, 38:21.

Со новите два бода, тимот предводен од Андоновски го зголеми бодовното салдо, сега има 14 бода, додека главните конкуренти на Раховец, Беса и Кастриоти, два пода помалку – 12.

За Раховец ваквите полесни натпревари со домашни екипи се проверка на силите пред големиот предизвик во Европскиот Куп.

На 23 ноември, Раховец во рамки од 3. коло од третото по ранг европско клупско натпреварување ќе биде домаќин на романската Баја Маре, а реванш дуелот ќе биде на 30 ноември во Романија.

Најдобрите македонски судии Славе Николов и Ѓорѓи Начевски ќе бидат дел од Светското првенство 2025 година во Данска, Норвешка и Хрватска.

Светската ракометна федерација ги објави официјалните лица за Мундијалот, а меѓу нив се најде и македонската двојка.

Николов и Начевски зад себе имаат одработено многу големи натпреварувања  – ЕП, СП и ОИ, а судеа на финалиња на сите.

Номинацијата на СП 2025 е уште еден доказ за нивниот квалитет, а покрај Николов и Начевски, на Мундијалот ќе судат уште 23 двојки од целиот свет.

Освен Николов и Начевски, Македонија ќе биде претставена од ракометарите кои ќе играат во групата во Вараждин со селекциите на Унгарија, Холандија и Гвинеја.

Ракометарките на Вардар обезбедија пласман на Ф4 во Купот на Македонија, откако во финалето од групата В славеа над Пелистер со 34:21.

Избраничките на Платон до убедливиот триумф дојдоа со подобрата игра во второто полувреме, на пауза имаа минимална предност од плус три, 11:8.

Леона Миленковска и Сара Богојеска беа најефикасни во редовите на „црвено-црните“, натпреварот го завршија со по седум гола.

Во таборот на Пелистер десното крило Моника Босилковска ги предводеше стрелците со осум гола, два помалку имаше Наталија Дишковска.

Вардар пред две сезони играше финале во Купот, во неизвесен натпревар загуби од Куманово, додека во минатата сезона беше елиминиран во полуфиналето од Чаир.

Шпанскиот стратег Раул Алонсо ќе биде нов предводник на македонскиот шампион Еурофарм Пелистер. Тој потпиша договор до крајот на оваа и за следната сезона, па ќе остане во Битола најмалку до летото 2026 година.

45-годишниот Раул Алонсо голем дел од својата ракометна кариера како тренер ја мина во Германија. Тој работеше во Обернбург, Рајн Мен Бинен, а од 2010 до 2015 година беше дел од стручниот штаб на големиот Кил.

Со „зебрите“ стана двоен европски првак како асистент на Алфред Гисласон, а заедно освоија и серија на домашни трофеи од Бундеслигата, Купот и Супер Купот на Германија.

Потоа стана директор на академијата на Кил, а напоредно работеше и во Германската ракометна федерација. Самостојна кариера почна во Австрија, каде со успех го водеше Тирол. Во 2018 година ја прифати понудата на Маноло Каденас и се пресели во Мешков Брест како асистент тренер.

По само една сезона го презеде кормилото на белорускиот првак и не погреши. Во две сезони како прв тренер на екипата ги освои сите домашни трофеи и стигна до четвртфиналето и осминафиналето на Лигата на шампионите. Во 2022 година Раул се врати во Германија и го водеше тимот на Ерланген.

Тој би требало да го има своето деби на клупата на Еурофарм Пелистер веќе на мечот со Прилеп в петок, додека во Лигата на шампионите ќе дебитира на дуелот со данската Фредериција.