Аргентинецот Гиљермо Милано почна да ги води тренинзите на Вардар и веќе во сабота нa гостувањето во Струга треба да дебитира на клупата на најтрофејниот македонски ракометен клуб.

Tој вели дека со нетрпение чекал да пристигне во македонската престолнина и да започне со работа со двократниот европски првак.

„Со нетрпение го очекував доаѓањето во Скопје и запознавањето со ракометарите, и веќе ги имав и првите тренизни со екипата. Морам да кажам дека како тим со кој ќе раководам имам вистински професионалци кои ми оставија одличен впечаток. Првите впечатоци се одлични, и очекувам, и знам дека ќе напредуваме на секое поле. Не очекува период полн со натпревари, но верувам дека сите заедно ќе успеме во исполнување на поставените задачи“, изјави Милано.

Дел од ракометарите кои настапуваа за своите национални репрезентации се пожалија на мали повреди и тие ги пропиштија првите тренинзи неделава, но набрзо ќе се приклучат на екипата.

Актуелниот шампион Еурофарм Пелистер на свој терен без проблеми триумфираше над Прилеп со 46:24 во натпревар од 11. коло во Супер лигата,

За пелистерци ова беше 9-ти сезонски триумф во домашниот шампионат и загревање за важниот натпревар против Фредериција во Лигата на шампионите.

Повремениот тренер на Еурофарм Пелистер, Звонко Шундовски, вели дека сите играчи на денешниот натпревар го дале максимумот.

,,Најважно е дека ракометарите сериозно ја сфатија работата, генерално ова ни е последна подготовка пред натпреварот со Фредериција, новиот тренер е тука, мислам дека целиот расположлив ростер го виде денес, виде како и со што располагаат играчите, пред доаѓањето тој има направено анализа за каква екипа се работи, задоволен е од екипата и нормално, им честитам на играчите за максималното ангажирање на овој натпревар”, изјави Шундовски.

Капитенот на Прилеп, Христи Бикоски, вели дека е задоволство да се игра против битолскиот тим.

,,Чест и големо задоволство е да се игра против една ваква екипа која игра во ЛШ. Се подготвуваме, трениравме, ја искористивме оваа ЕХФ пауза, овој натпревар за нас беше тест, бидејќи во следното коло не очекува тежок натпревар со Пролет на гостински терен и се надеваме на позитивен резултат во Скопје”, изјави Бикоски.

Пелистерци со лесна победа над Прилеп се загреаја за Фредериција

Денешниот натпревар меѓу амбициозниот Охрид и третопласираниот тим од минатата сезона, тимот на Кирил Лазаров, треба да биде белег на 11. коло во најквалитетното натпреварување во Македонија.

Тимот од Автокоманда во Охрид ќе бара продолжување на победничката серија, односно ќе атакува на 11-ти сезонски триумф, додека избраниците на Стевче Алушовски, по поразот од Вардар, ќе посакуваат враќање на победничките патеки и натпреварот против „сино-белите“ за нив ќе биде императив за да се освојат двата бода.

На денешната домашна програма ќе има уште четири суперлигашки дуели. Интересно би требало да биде во градската пресметка меѓу Пролет и Бутел Скопје, две екипи кои што посакуваат пласман во плеј-оф фазата. Бутелци се на добар пат да дојдат до посакуваната цел, бидејќи на десет натпревари остварија шест победи и на свое конто имаат десет бода.

Тимот предводен од Александар Јовиќ се наоѓа на 8. позиција со осум бода, но доколку победи против Бутел Скопје, тогаш ќе си ги зголеми шансите за пласман меѓу најдобрите шест екипи.

Вардар ќе гостува во Струга кај истоимената екипа, додека Куманово ќе биде домаќин на последнопласираниот Радовиш. Екипата на Куманово ќе има убава можност пред домашната публика да се покаже во одлично светло и да дојде до трет сезонски триумф.

Тиквеш, екипа која игра топло-ладно сезонава, во Велес кај дебитантот Бисинов ќе оди по освојување на важните два бода, но на овој натпревар се прашуваат и домаќините кои секогаш биле незгоден ривал на свој терен.

Денеска европски настап има Чаир, кој за ривал во третото коло од Европскиот Куп го доби незгодниот тим од Португалија, Колехио Де Гаиа. Влезот за двата меча во Автокоманда ќе биде слободен, па чаирчанки ќе може да сметаат на голема поддршка од трибините како и во досегашните европски настапи.

Првиот натпревар меѓу Чаир и Колехио Де Гаиа ќе се одигра денеска, со почеток од 16:00 часот, додека следниот дуел е утре во истото време на истото место.

ДЕНЕСКА НА ТЕРЕНИТЕ:
12:00 ЃОРЧЕ ПЕТРОВ – СТРУЖАНКА (МАКЕДОНИЈА)
13:00 ПАРТИЗАН – ПРЕСПА (МАКЕДОНИЈА)
13:30 СТРУГА – ВАРДАР (МАКЕДОНИЈА)
14:00 КУБАН – ЦСКА (РУСИЈА)
15:00 КУМАНОВО – РАДОВИШ (МАКЕДОНИЈА)
15:30 ФЕРЕНЦВАРОШ – ЃЕР (УНГАРИЈА)
16:00 ДРАЧЕВО – ВАРДАР НЕГОТИНО (МАКЕДОНИЈА)
16:00 ВИТОРИЈА – ПОРТО (ПОРТУГАЛИЈА)
16:00 ФРЕДЕРИЦИЈА – СИЛКЕБОРГ (ДАНСКА)
16:00 ЛУДВИГСБУРГ – ВАЈПЕРС (ЛШ)
16:00 НИКОБИНГ – БИСТРИЦА (ЛШ)
16:00 КОЛЕХИО ДЕ ГАИА – ЧАИР (ЕВРОПСКИ КУП)
17:00 ОВЧЕ ПОЛЕ – ЈЕХОНА (МАКЕДОНИЈА)
18:00 МЛАДОСТ – ШАМПИОН (МАКЕДОНИЈА)
18:00 ЦВИКАУ – НЕКАРСУЛМЕР (БУНДЕС)
18:00 БИСИНОВ – ТИКВЕШ (МАКЕДОНИЈА)
18:00 ПАРТИЗАН – РАДНИЧКИ (СРБИЈА)
18:00 МЕЦ – КРИМ (ЛШ)
18:00 ПОДРАВКА – СТОРХАМАР (ЛШ)
18:00 СЕГЕД – ВЕСПРЕМ (УНГАРИЈА)
18:30 ОХРИД – АЛКАЛОИД (МАКЕДОНИЈА)
18:30 ПРОЛЕТ – БУТЕЛ (МАКЕДОНИЈА)
19:00 МЕТАЛУРГ РА – КИЧЕВО (МАКЕДОНИЈА)
19:00 ЛЕМГО – АЈЗЕНАХ (БУНДЕС)
19:00 ГРАЦ – ВЕСТ ВИЕН (АВСТРИЈА)
19:00 КОБЕРЖИЦЕ – ЛАРВИК (ЛИГА ЕВРОПА)
19:00 ЕЛЧЕ – ЛОК. ЗАГРЕБ (ЛИГА ЕВРОПА)
19:00 ДАЛМАТИНКА – ХАУКАР (ЕВРОПСКИ КУП)
19:00 ЈАГОДИНА – ЈОНИЈАС (ЕВРОПСКИ КУП)
20:00 САМБРЕ – СЕНТ МОР (ФРАНЦИЈА)
20:30 МЕЛСУНГЕН – МАГДЕБУРГ (БУНДЕС)

Тимот предводен од Кире Лазаров продолжува без пораз во Супер лигата, славеше на гостувањето кај Охрид со 29:22 и со новите два бода се зацврсти на првата позиција на табелата, додека „гладијаторите“ остануваат на 16 бода.

Како што се очекуваше, натпреварот започна со борбена игра на двете страни, домаќините беа тие кои први поведоа, потоа се играше гол за гол, а по нерешените 7:7, тимот на Кире Лазаров започна да се одлепува, до крајот на првото полувреме водеше со еден до три гола разлика. Предводници во нападот на гостите беа Митев и Серафимов, двајцата постигнаа вкупно девет гола во првиот дел. По 30 минути игра резултатот беше 16:14 во корист за гостинот.

На стартот на вториот дел гостинот со два гола во низа дојде до 17:14, имаше напад и за плус три, но голманот Ѓорѓески го одбрани ударот на Ѓорѓиев, а потоа реализираше Пешиќ за минус два, 17:15. Она што домаќините не го направија на стартот на вториот дел, го остварија во 36 минута кога Цирар од пенал го совлада Галевски за минус еден, 18:17.

Охрид наместо да израмни во 40 минута, дозволи гостинските ракометари со мини серија да дојдат до 21:18, па тренерот на домаќините Стевче Алушовски мораше да го искористи вториот тјам-аут. Тимот од Автокоманда продолжи да реализира и во 45 минута имаше плус шест, 23:18.

До крајот гостите водеа, играа лесно, се разбрани Галевски и веќе во 50 минута при нивно водство од 25:20, беше јасно дека бодовите ќе заминат во Автокоманда.

Мартин Серафимов имаше свој ден, натпреварот го заврши со 12 гола, кај домаќините најефикасни беа Иван Тасески, Живан Пешиќ и Гал Цирар, сите тројца имаа по четири гола.

Ракометарките на Чаир славеа против португалскиот тим Колехио Де Гаиа со 29:25 во рамки од првиот меч од 3. коло од Европскиот Куп.

Чаирчанки на реваншот, кој ќе се одигра утре, на истото место и во истиот термин (Автокоманда, 16:00 часот) ќе имаат убава можност со победа да го заверат пласманот во осминафиналето во третото по ранг европско клупско натпреварување.

Во првиот дел двете екипи играа променливо, најпрво гостинската екипа беше таа која што успеа да се одлепи, потоа Чаир од средината на првиот дел, па до последната минута од првото полувремето константно беше во предност, но немаше голема комоција во играта, бидејќи гостинките од Португалија постојано се закануваа.

По предноста на Чаир од 13:11, гостинскиот тим со два гола во низа успеа да се врати во игра израмнувајќи на 13:13. Црногорската интернационалка во редовите на Чаир, голманката Магдалена Којовиќ, бранеше кога беше најпотребно и до 25 минута имаше шест интервенции, речиси сите беа во дуел еден на еден. По 30 минута игра резултатот беше 16:15 за Колехио Де Гаиа.

Избраничките на Басри Љатифи за десет минути игра во вториот дел успеаја да дојдат до поизразена предност, во 40 минута поведоа со 22:17. Ракометарките на Колехио Де Гаиа не се откажуваа и како одминуваше времето, беа многу блиску до враќање. Чаир во последните десет минути влезе со 23:22 и до финишот успеа да ја сочува, но и да ја надгради предноста.

Предводник кај Чаир беше искусната Теодора Гулицоска, која постигна 13 гола, по шест имаа Теодора Дукоска и Стефанија Ѓорѓиевска.