Екипата на ПИК Сегед наскоро треба да го соопшти името на новиот тренер за новата натпреварувачка сезона. Откако во месец ноември, минатата година, раководството на клубот објави дека нема да биде продолжена соработката со актуелниот тренер Хуан Карлос Пастор, во изминатиот период континуирано се шпекулира околу неговиот нов наследник.
Во ракометните кругови како потенцијален кандидат за нов тренер на ПИК Сегед се спомнуваше името на екс предводникот на Вардар, Раул Гонзалес, кој со македонскиот шампион освои титула во Лигата на шампионите. Пред извесен период се појави информацијата дека тренерот на Келце, Талант Душебаев заедно со неговите синови Алекс и Даниел имале богата понуда од унгарскиот шампион.
Според унгарскиот портал ,,Handball Expert”, еден од кандидатите за наследник на Хуан Карлос Пастор е селекторот на машката сениорска репрезентација на Исланд, Гудмундур Гудмундсон. Искусниот стратег од островската земја има богато ракометно портфолио. Во својата тренерска кариера беше предводник на двата бундеслигаши Рајн Некар и Мелсунген, работеше и во Данска, односно во сегашниот дански шампион ГОГ, додека на репрезентативно ниво беше предводник и на репрезентациите на Данска и Бахреин.
Гудмундсон со репрезентацијата на Данска, во која беше предводник во периодот од 2014 до 2017 година, го освои златниот медал на Олимписките игри во Бразил (2016), додека со репрезентацијата на Бахреин постигна одлични резултати на Азискиот шампионат во 2018 година освојувајќи ја 2. позиција.
Со исландската репрезентација како селектор има освоено сребро на Олимписките игри во Пекинг (2008), како и бронзен медал на Европското првенство во 2010 година, кое беше одржано во Австрија.
ПИК Сегед по крајот на оваа сезона освен тренерот Хуан Карлос Пастор, ќе го напуштат и Александар Блонц (ГОГ), како и Мирко Алиловиќ и Миклош Роста, кои се пред трансфер во Висла Плоцк, односно Динамо Букурешт. За новата сезона клубот го потврди трансферот само на голманот од Елверум, Емил Имсгард.
ПОВРЗАНИ ВЕСТИ
